Bhayander Viral Video News: भाईंदरमध्ये शिवसेनेच्या कंटेनरचा गैरवापर? भाजप नगरसेवाकाचा गंभीर आरोप अन् व्हिडिओ व्हायरल!

Bhayander Viral Video News: भाईंदरमध्ये लोकांच्या सेवेसाठी आणलेले शिवसेनेचे कंटेनर आता वादाच्या भोवऱ्यात अडकले आहेत. एका कंटेनरमध्ये डेकोरेशनचे साहित्य, तर दुसऱ्यात अश्लील प्रकार सुरू असल्याचा खळबळजनक दावा भाजप नगरसेवकाने केला आहे. या प्रकारामुळे शहरात एकच खाडकन खळबळ उडाली असून व्हिडिओही व्हायरल होत आहे.

• भाईंदरमधील शिवसेनेच्या कंटेनरचा गैरवापर
• एका कंटेनरमध्ये डेकोरेशन आणि दुसऱ्यात अश्लील चाळे सुरू
• कंटेनर हटवून संबंधितांवर कारवाईची मागणी 

Bhayander Viral Video News: भाईंदर पूर्व येथील सोनल पार्क परिसरात एका खासगी जागेवर ठेवण्यात आलेल्या शिवसेनेच्या कंटेनरवरून आता राजकारण चांगलेच तापले आहे. लोकांच्या सामाजिक कार्यासाठी आणलेल्या या कंटेनरचा वापर भलत्याच कामांसाठी होत असल्याचा खळबळजनक आरोप भाजपचे नगरसेवक तरुण शर्मा यांनी केला आहे. एका कंटेनरमध्ये डेकोरेशनचे साहित्य भरल्याचे समोर आले आहे, तर दुसऱ्या कंटेनरमधील काही तरुणांचे अश्लील चाळे कॅमेऱ्यात कैद झाल्याचा दावा केला जात आहे. याप्रकरणी सोशल मीडियावर व्हिडिओ व्हायरल झाल्यानंतर परिसरात मोठी चर्चा रंगली आहे.

नक्की काय आहे प्रकरण?

मूळात शिवसेनेच्या माध्यमातून नागरिकांच्या सेवेसाठी हे कंटेनर उपलब्ध करून देण्यात आले होते. मात्र, महापालिकेकडून कारवाई टाळण्यासाठी हे कंटेनर आधीच्या ठिकाणावरून हटवून सोनल पार्क येथील एका खासगी जागेवर आणून ठेवण्यात आले. परंतु, आता या कंटेनरचा वापर सामाजिक कामासाठी नसून पूर्णपणे खासगी आणि संशयास्पद कारणांसाठी होत असल्याचा आरोप केला जात आहे.

भाजप नगरसेवक तरुण शर्मा यांनी दिलेल्या माहितीनुसार, एका कंटेनरमध्ये लग्नसमारंभ किंवा इतर कार्यक्रमांचे डेकोरेशन साहित्य ठेवण्यात आले असून, यासाठी जागामालकाला अडीच ते तीन हजार रुपये भाडे दिले जात असल्याची चर्चा आहे. तर त्याहूनही गंभीर म्हणजे, दुसऱ्या कंटेनरमध्ये तरुण-तरुणी अश्लील कृत्य करत असल्याचा व्हिडिओ सध्या सोशल मीडियावर आगीसारखा पसरला आहे. “लोकांच्या सेवेसाठी आणलेल्या कंटेनरचा असा गैरवापर होत असेल, तर ही अत्यंत निंदनीय बाब आहे,” असा संतप्त सवाल शर्मा यांनी उपस्थित केला आहे.

हेही वाचा: Mumbra Drug Seizure: आकाशात नाही, थेट मुंब्र्यातील फ्लॅटमध्ये काळाबाजार! परदेशी नागरिक जाळ्यात; दीड कोटींचे ड्रग्स जप्त!

बाळासाहेब ठाकरे आणि आनंद दिघे यांचे छायाचित्र

विशेष म्हणजे, ज्या कंटेनरवरून हा वाद निर्माण झाला आहे, त्या कंटेनरवर शिवसेनेचे अधिकृत बॅनर लावण्यात आले असून त्यावर हिंदुहृदयसम्राट स्वर्गीय बाळासाहेब ठाकरे आणि धर्मवीर स्वर्गीय आनंद दिघे यांचे छायाचित्र देखील झळकत आहे. थोर नेत्यांच्या प्रतिमेचा वापर असलेल्या अशा साहित्याचा गैरवापर होत असल्याने शिवप्रेमींमध्येही संताप व्यक्त होत आहे.

हेही वाचा: Alephata Crime News: आळेफाटा परिसरात खळबळ! २६ वर्षांच्या तरुणाकडे सापडला गावठी कट्टा अन् जिवंत काडतुसे!

या संपूर्ण प्रकरणाची पोलीस प्रशासनाने कसून चौकशी करावी, दोषींवर कठोर कायदेशीर कारवाई करावी आणि हे वादग्रस्त कंटेनर सोनल पार्क परिसरातून तात्काळ हटवावेत, अशी लिखित मागणी नगरसेवक तरुण शर्मा यांनी नवघर पोलीस ठाण्याकडे केली आहे.

दरम्यान, या सर्व प्रकारावर अद्याप शिवसेनेच्या स्थानिक नेत्यांकडून कोणतीही अधिकृत प्रतिक्रिया समोर आलेली नाही. त्यामुळे शिवसेना यावर काय भूमिका घेणार आणि विरोधकांच्या आरोपांना कसे प्रत्युत्तर देणार, याकडे संपूर्ण शहराचे लक्ष लागले आहे.