शनिवार, 26 सप्टेंबर 2026
गुंतवणुकीतून चांगला परतावा देण्याच्या आमिषाने व्यावसायिकाला गंडा; 20 लाखांची केली फसवणूक
नागपूर : वृत्तवाहिनीमध्ये भागीदार करून गुंतवणुकीवर भरघोस नफा मिळवून देण्याचे आमिष दाखवत मेडिकल व्यावसायिकाची तब्बल 20 लाखांची फसवणूक केल्याचा धक्कादायक प्रकार समोर आला आहे. गुंतवलेली रक्कम परत मागितल्यानंतर कार्यालयात बोलावून मारहाण केली. एवढेच नव्हे तर पिस्तूल दाखवून खिशातील ५० हजार रुपये हिसकावले आणि ठार मारण्याची धमकीही दिली.
याप्रकरणी सीताबर्डी पोलिसांनी निशांत प्रमोद गुप्ता (वय ४३, रा. दोसर भवन चौक) यांच्या तक्रारीवरून ७ जणांविरुद्ध गुन्हा दाखल केला आहे. कथित आरोपींमध्ये रितेश बोरकर, प्रमोद भागचंदानी, विजय खवसे, रिंकू पानतवणे, उमेश यादव, सुजीत भोयर आणि सुनील मांगलकर यांचा समावेश आहे. या प्रकरणामुळे प्रमोद भागचंदानी पुन्हा चर्चेत आला आहे. चार दिवसांत त्याच्याविरुद्ध दाखल झालेला हा तिसरा गुन्हा आहे. निशांत यांचे मेयो रुग्णालयासमोर कांचन मेडिकल स्टोअर आहे. २०२२ मध्ये त्यांची रितेश बोरकरशी ओळख झाली.
रितेशने स्वतःला ‘महा न्यूज ७’ या वृत्तवाहिनीचा संचालक असल्याचे सांगितले. वृत्तवाहिनीचा विस्तार करण्यासाठी गुंतवणूकदारांची आवश्यकता आहे. गुंतवणुकीच्या बदल्यात चांगला नफा मिळेल, असे सांगून त्याने निशांत यांना गुंतवणुकीसाठी तयार केल्याचा आरोप आहे. निशांत यांनी वेगवेगळ्या वेळी रोख, ऑनलाईन आणि आरटीजीएसद्वारे सुमारे २० लाख रुपये दिले. त्याशिवाय परिचित अनिल पटेल यांच्याकडून दोन लाख रुपये घेऊन तेही रितेशला दिल्याचे तक्रारीत म्हटले आहे.
पार्टनरशिप डीड करतो म्हणाला अन्…
भागीदारी करार तयार करण्यात येईल, असे सांगण्यात आले होते. तसेच सुरक्षेच्या नावाखाली एचडीएफसी बँकेचा स्वाक्षरी केलेला कोरा धनादेशही घेतल्याचा आरोप आहे.
कार्यालयात बोलावून केली मारहाण
भागीदारी करार तयार करण्याचे आश्वासन दिल्यानंतरही रक्कम परत मिळाली नाही. त्यामुळे दोघांमधील वाद वाढला. पुढे तडजोडीनुसार काही साहित्य परत करण्याचे ठरल्याचे तक्रारीत नमूद आहे. १५ मे २०२५ रोजी रितेशने निशांत यांना वृत्तवाहिनीच्या कार्यालयात बोलावले. तेथे रितेशसह उमेश यादव, सुजीत भोयर, सुनील मांगलकर, रिंकू पानतवणे, प्रमोद भागचंदानी आणि विजय खवसे उपस्थित होते. तेथे आरोपींनी शिवीगाळ करून मारहाण केली. याचवेळी प्रमोद भागचंदानीने पिस्तूल दाखवून धमकावले आणि निशांत यांच्या खिशातील ५० हजार रुपये काढून घेतल्याचे तक्रारीत म्हटले आहे.
