File Photo : Nagpur Central jail
नागपूर : गेल्या काही दिवसांपासून गुन्हेगारीच्या घटनांमध्ये वाढ होत आहे. त्यातच नागपूर मध्यवर्ती कारागृहात पुन्हा एकदा जेवणावरून तीन कैद्यांमध्ये हाणामारी झाली. यात 2 कैद्यांनी जेवण देणाऱ्या तिसऱ्या कैद्याच्या डोक्यावर भांडी मारत त्याला गंभीर जखमी केले. ही घटना गुरूवारी सायंकाळच्या सुमारास घडल्याची माहिती मिळाली आहे.
हेदेखील वाचा : डोळे, चेहरा आणि गुप्तांगावर जखमा…,लैगिंक अत्याचारानंतर हत्या! कोलकात्याच्या ‘निर्भया’ हत्येचे गुढ असे उकलले
सुमित आनंद मून असे जखमी कैद्याचे नाव असल्याचे सांगण्यात येत आहे. सिद्धेश सतीश घाडगे आणि मनोज प्रकाश वाघमारे अशी आरोपी कैद्यांची नावे आहेत. मिळालेल्या माहितीनुसार, जखमी कैद्याला कारागृहात जेवण वाटपाची जबाबदारी देण्यात आली आहे. गेल्या गुरूवारी सायंकाळच्या सुमारास हे दोन्ही कैदी सुमितकडे जेवण घेण्यासाठी आले होते. सुमितने सिद्धेशला भाजी दिली. काही वेळाने सिद्धेशने हातातली भाजी आणून भाजी भांड्यात टाकली. यावरून सुमित आणि सिद्धेशमध्ये भांडण सुरू झाले. या दरम्यान सिद्धेशने त्याचा मित्र मनोजसोबत मिळून सुमितच्या डोक्यावर तेथेच ठेवलेल्या भांड्याने प्रहार केला. डोक्यातून रक्ताची धार लागली.
दरम्यान, कर्तव्यावर हजर असलेल्या कारागृह रक्षकांनी धाव घेत सुमितची आरोपीच्या तावडीतून सुटका केली. त्याला उपचारासाठी मध्यवर्ती कारागृह रुग्णालयात दाखल केले. कारागृह प्रशासनाच्या तक्रारीवरून दोन्ही कैद्यांवर धंतोली पोलिस ठाण्यात गुन्हा दाखल करण्यात आला आहे. पुढील तपास सुरू आहे.
येरवडा येथील कारागृहातही हाणामारी
काही दिवसांपूर्वी विरोधी गटातील गुन्हेगारांना माहिती पुरवित असल्याच्या कारणावरून एका कैद्याला मारहाण करण्यात आल्याची घटना येरवडा कारागृहात घडली. याप्रकरणी तीन कैद्यांवर येरवडा पोलीस ठाण्यात गुन्हा दाखल करण्यात आला आहे. असे असताना आता नागपूरच्या कारागृहात कैद्यांमध्ये हाणामारी झाल्याचे प्रकरण समोर आले आहे.
हेदेखील वाचा : रेल्वे प्रवासादरम्यान विदेशी पिस्तुल आणि 14 काडतुसे घेऊन जाणाऱ्या आरोपी मॉडेलला अटक
