अशोक खरातला पोलिस कोठडी (फोटो- सोशल मीडिया)
अशोक खरातला 29 मार्चपर्यन्त कोठडी
साप, नागाबद्दल माहिती नाही – अशोक खरात
पोलिस कोठडीत 5 दिवसांची वाढ
Ashok Kharat Police Custody: भोंदू बाबा अशोक खरातला आज कोर्टात हजर करण्यात आले होते. दरम्यान कोर्टाने त्याला 29 मार्चपर्यंत पोलिस कोठडी सुनावली आहे. त्यामुळे अशोक खरातच्या अडचणीत वाढ झाली आहे. नाशिकमध्ये उजेडात आलेल्या लैंगिक अत्याचार प्रकरणात अशोक खरातच्या अडचणी वाढल्या आहेत.
आज आरोपी अशोकह खरातची पोलिस कोठडी संपली असल्याने त्यांना कोर्टात (Crime News) हजर करण्यात आले होते. सरकारी पक्षाने खरातच्या पोलिस कोठडीची मागणी केली होती. कोर्टाने आरोपी अशोक खरातला 5 दिवसांची म्हणजे 29 मार्चपर्यंत पोलिस कोठडी सुनावली आहे. त्यामुळे अशोक खरातची चौकशी झाल्यावर अनेक गोष्टी समोर येणार आहेत.
अशोक खरातला कोर्टात हजर करण्याच्या आधी त्याची आरोग्य तपासणी करण्यात आली. कोर्टात हजर केले असताना कोर्ट परिसरात चोख पोलिस बंदोबस्त ठेवण्यात आला होता. कोर्ट परिसरात मोठी गर्दी झाल्याचे देखील पाहायला मिळाली. एसआयटीने कोर्टात अशोक खरातबाबत अनेक पुरावे/ माहिती सादर केल्याचे म्हटले जात आहे.
भोंदू बाबा खरातचा गरोदर बाईवर अत्याचार
नाशिकमध्ये सध्या खळबळ माजली आहे. तंत्र-मंत्र व अघोरी विद्येचा धाक दाखवून महिलांवर बलात्कार करणाऱ्या कॅप्टन अशोक खरात यांचं प्रकरण बरंच तापलं आहे. तथाकथित आध्यात्मिक गुरू आणि स्वतःला ‘बाबा’ म्हणवून घेणाऱ्या अशोक खरातचे काळे कारनामे आता एकामागून एक चव्हाट्यावर येऊ लागले आहेत. नाशिकच्या सरकारवाडा पोलीस ठाण्यात खरातविरोधात आता लैंगिक अत्याचाराचा आणखी एक अत्यंत गंभीर गुन्हा दाखल करण्यात आला आहे. विशेष म्हणजे, पीडित महिला गर्भवती असताना तिच्या असहायतेचा फायदा घेऊन या नराधमाने अघोरी कृत्य केल्याचा खळबळजनक प्रकार समोर आला आहे.
तक्रारीनुसार, पीडित महिला जेव्हा गर्भवती होती, तेव्हा तिला ‘दोष निवारण’ आणि ‘पूजा विधी’च्या नावाखाली अशोक खरातकडे नेण्यात आले होते. यावेळी खरातने पीडितेच्या पतीला खोलीबाहेर बसवून आतमध्ये तिच्यावर लैंगिक अत्याचार केले असल्याचं समोर आलं आहे. इतकेच नव्हे, तर तो लोकांना घाबरवण्यासाठी नकली साप आणि नकली वाघाच्या कातड्याचा वापर करायचा. या वस्तू दाखवून तो ‘अघोरी शक्ती’ असल्याचे भासवायचा आणि लोकांच्या मनात भीती निर्माण करायचा असे प्रकार समोर येत आहे.
