Cyber Crime: सायबर गुन्हेगारांचा सुळसुळाट वाढला; ३ जणांची तब्बल ‘इतक्या’ लाखांची फसवणूक

सायबर चोरट्यांकडून पोलीस कारवाईची भिती दाखवून फसवणूकीचे सत्र कायम असून, पुण्यातील एका २८ वर्षीय नोकरदार तरुणीला १० लाख रुपयांना गंडा घातला आहे.

पुणे: सायबर गुन्ह्यांचा आलेख वाढतच चालला असून, पुन्हा तीन घटनांमध्ये दोन तरुणी अन् एका तरुणाची ३३ लाखांना गंडा घातला आहे. वेगवेगळ्या बहाण्याने तसेच पोलीस कारवाईची भिती घालून ही फसवणूक करण्यात आली आहे. याप्रकरणी कोथरूड पोलीस ठाण्यात ३० वर्षीय तरुणीने तक्रार दिली आहे. त्यानूसार, मोबाईल धारक व वापरकर्ते यांच्यावर गुन्हा दाखल केला आहे.

पोलिसांच्या माहितीनुसार, तक्रारदार तरूणी नोकरी करते. दरम्यान, तिला सायबर चोरट्यांनी एक लिंक पाठवून त्यांना नुवामा प्रो अॅप डाऊनलोड करण्यास सांगितले. तसेच, त्यानंतर त्याच्यावर पैसे जमा करण्यास भाग पाडले. त्यांना या अॅपवरून भरघोस नफा मिळत असल्याची बतावणी केली. त्यांनी १० लाख ९५ हजार रुपये भरले. मात्र, त्यांना नफा मिळाला नाही. दुसऱ्या घटनेत तरुणाची तब्बल १२ लाख ४३ हजार रुपयांची फसवणूक केली आहे. याप्रकरणी कोंढवा पोलीस ठाण्यात २६ वर्षीय तरुणाने तक्रार दिली आहे. तरुणाला युट्यूब पेजला लाईक्स व सबस्क्राईब केल्यावर मोठा नफा मिळेल, असे आमिष दाखवून त्याला पैसे भरण्यास भाग पाडले. परंतु, त्याला कसलाही नफा न देता त्याची फसवणूक केली आहे. पुढील तपास पोलीस करत आहेत.

पोलीस कारवाईची भिती दाखवून फसवणूक

सायबर चोरट्यांकडून पोलीस कारवाईची भिती दाखवून फसवणूकीचे सत्र कायम असून, पुण्यातील एका २८ वर्षीय नोकरदार तरुणीला १० लाख रुपयांना गंडा घातला आहे. याप्रकरणी चतु:श्रृंगी पोलीस ठाण्यात गुन्हा दाखल केला आहे. तक्रारदार तरुणीला मुंबई ते इराण असे पाठविलेल्या पार्सलमध्ये कालबाह्य पाच पासपोर्ट, क्रेडीट कार्ड आणि पेन ड्राईव्ह सापडले आहे. त्यामुळे तुमचे खाते तपासावे लागेल असे सांगितले. नंतर त्यांचा विश्वास संपादनकरून तसेच त्यांना पोलीस कारवाईची भिती दाखवून त्यांना १० लाख रुपये ट्रान्सफर करण्यास भाग पाडले.

कांदा व्यापाऱ्याची लाखो रुपयांची फसवणूक

बंगळुरुमधील एका कांदा व्यापाऱ्याची ५ लाख रुपयांची फसवणूक केल्याचा प्रकार समोर आला आहे. या कांदा व्यापाऱ्याने मालाची ऑर्डर देऊन पैसे दिल्यानंतर देखील त्याला कांदा न पाठवता फसवणूक केल्याचे म्हंटले आहे. याप्रकरणी मार्केटयार्ड पोलिसांनी धनंजय खुशालचंद बोरा याच्यावर गु्न्हा दाखल केला आहे. याबाबत शशीकुमार टी. वैद्यलिंगम पिल्लई (वय ४६, रा. रवींद्रनगर, बंगळुरू, कर्नाटक) यांनी तक्रार दिली आहे.

हेही वाचा: कांदा व्यापाऱ्याची लाखो रुपयांची फसवणूक; ऑनलाईन पैसे घेतले अन्…

पोलिसांच्या माहितीनुसार, शशीकुमार बंगळुरूमधील कांदा व्यापारी आहेत. त्यांनी पुण्यातील मार्केटयार्ड येथील घाऊक बाजारातून कांदा खरेदीसाठी प्रयत्न सुरू केले होते. तेव्हा त्यांचा बोरा याच्याशी संपर्क झाला होता. बोरा याने मार्केट यार्डात त्याचे गाळे असल्याचे सांगितले होते. नंतर शशीकुमार यांनी त्याच्याकडून २५ टन कांदा खरेदीचा व्यवहार केला. त्यापोटी त्याला ५ लाख रुपये पाठविले. २ नोव्हेंबर रोजी ट्रकमधून कांदा बंगळुरुतील पाठविल्याचे बोराने त्यांना सांगितले.