डेक्कन पोलिसांची मोठी कारवाई; मोबाईल हिसकावणाऱ्या चोरट्याला घेतले ताब्यात

मोबाईल हिसकावणाऱ्या सराईताला डेक्कन पोलिसांनी बेड्या ठोकल्या आहेत. त्याच्याकडून चार मोबाईल जप्त केले असून, तीन गुन्ह्यांची उकल करण्यात आली आहे.

सौजन्य - सोशल मिडीया

Follow Us:

Follow Us:

पुणे : पुण्यातून एक मोठी बातमी समोर आली आहे. रात्रीच्यावेळी कॅबची वाट पाहणाऱ्या तसेच रस्त्याच्या कडेला उभारलेल्या नागरिकांचे अंधाराचा फायदा घेऊन मोबाईल हिसकावणाऱ्या सराईताला डेक्कन पोलिसांनी बेड्या ठोकल्या आहेत. त्याच्याकडून चार मोबाईल जप्त केले असून, तीन गुन्ह्यांची उकल करण्यात आली आहे.

हबीब अबालु इराणी (वय २४, रा. पुणे-मुंबई रोडजवळ) असे अटक करण्यात आलेल्याचे नाव आहे. त्याच्याकडून डेक्कनमधील दोन व बाणेरमधील एक असे तीन गुन्हे उघडकीस आले आहेत. ही कारवाई वरिष्ठ निरीक्षक गिरीषा निंबाळकर, गुन्हे निरीक्षक प्रसाद राऊत यांच्या मार्गदर्शनाखाली उपनिरीक्षक महेश भोसले, अजय भोसले यांच्या पथकाने केली आहे.

पुणे शहरात मोबाईल हिसकावणाऱ्या चोरट्यांनी धुमाकूळ घातला आहे. पादचारी, दुचाकीस्वार व वाहनांची वाट पाहत थांबलेल्या नागरिकांकडील मोबाईल हिसकावून नेल्याच्या घटना घडत आहेत. डेक्कन परिसरात देखील दोन घटना घडल्या होत्या. यापार्श्वभूमीवर डेक्कन पोलीस हद्दीत गस्त घालत होते. तेव्हा हबीब इराणी याच्याबाबत माहिती मिळाली. त्यानूसार, पथकाने त्याला सापळा कारवाई करून पकडले. त्याची झडती घेतली असता त्याच्याकडून चार मोबाईल मिळाले.

सखोल तपास केला असता त्याने डेक्कन तसेच बाणेर व येरवड्यात मोबाईल हिसकावल्याची कबूली दिली. त्याच्याकडून तीन गुन्हे उघडकीस आले असून, त्याने आणखी कोठे मोबाईल हिसकावले आहेत का याबाबत पोलीस तपास करत आहेत. त्याच्यावर यापुर्वीचे देखील गुन्हे नोंद असून, यापुर्वी त्याच्यावर लोहमार्ग पोलीस, यवत तसेच हडपसर पोलिसांत गुन्हे नोंद असल्याचे सांगण्यात आले.

हे सुद्धा वाचा : पुण्यातील बुधवार पेठेत एकाच्या खुनाचा प्रयत्न; डोक्यात वीट घातली अन्…

पुन्हा तेच चोरटे ॲक्टीव्ह?

पुण्यात सहा वर्षांपुर्वी सोनसाखळी चोरट्यांनी मोठ्या प्रमाणात धुमाकूळ घातला होता. दिवसाला तीन ते चार सोनसाखळी चोरीच्या घटना घडत असत. पादचारी महिला तसेच ज्येष्ठ महिला या चोरट्यांच्या टार्गेटवर असत. तीन राज्यात या टोळ्यांनी मोठा गोंधळ घातला होता. पुणे पोलिसांनी तीन राज्यातील माहिती एकत्रित करून या चोरट्यांचा माग सुरू केला होता. नंतर यातील काही टोळ्यांना पकडण्यात यश देखील आले होते. त्यांच्यावर मोक्कासारखी कारवाई देखील केली होती. नंतर या घटना थांबल्या होत्या. परंतु, आता पुन्हा सहा वर्षांनी सोन साखळी टोळ्या ॲक्टीव्ह झाल्याचे गेल्या काही महिन्यांपासून दिसत आहे. त्यामुळे पुन्हा तेच चोरटे ॲक्टीव्ह झाले आहेत का ? असा प्रश्न उपस्थित झाला आहे.

Web Title: Deccan police has arrested a mobile phone thief nrdm

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com