रविवार, 15 नोव्हेंबर 2026
आमगावात विदेशी पाहुण्या पक्ष्यांचे आगमन! ५० प्रजातींचे पक्षी; स्थलांतरित पक्ष्यांचा चार महिने मुक्काम
Amravati News: गोंदिया जिल्ह्याला ‘तलावांचा जिल्हा’ म्हणून ओळखले जाते. हिवाळ्याची सुरुवात होताच जिल्ह्यातील विविध जलाशयांवर स्थलांतरित पक्ष्यांचे आगमन झाले आहे. हजारो किमीचा प्रवास करून आलेल्या या परदेशी पाहुण्यांनी केवळ तलावांत आणि धरणांचे सौंदर्यच वाढवले नाही, तर पक्षीप्रेमींमध्ये उत्साहही निर्माण केले आहे.(फोटो सौजन्य – AI)
स्थलांतरित पक्षी येथे नोव्हेंबर ते जानेवारीदरम्यान येतात. त्यापैकी बरेच पक्षी हिमालयीन प्रदेश, तसेच सायबेरिया आणि युरोपीय देशांमधून लांबचा प्रवास करून येतात. अनुकूल परिस्थिती, पाण्याची पुरेशी पातळी आणि अन्नाची उपलब्धता यामुळे हे पक्षी स्थलांतरासाठी गोंदियाच्या जलाशयांना पसंती देतात. फेब्रुवारी आणि मार्चच्या सुमारास हे पक्षी आपल्या मायदेशी परतीच्या प्रवासावर असतात. आतापर्यंत जिल्ह्यात ५० हून अधिक प्रजातींचे स्थलांतरित पक्षी आल्याची नोंद झाली आहे.
ग्रेलाग हंस, कॉमन पोचार्ड, रेड-क्रेस्टेड पोचार्ड, गार्गनी, आर्क्टिक टर्न, ब्लॅक-टेल्ड गॉडविट, नॉर्दर्न पिंटेल, ओपनबिल स्टॉर्क, कॉर्पोरल, पर्पल मूरहेन, व्हाइट-ब्रेस्टेड वॉटरहेन आणि ग्रे हेरॉन यांसारख्या पक्षी प्रजातींचा समावेश आहे. हे पक्षी जंगलांनी वेढलेल्या जलाशयांमध्ये अधिक प्रमाणात आढळतात. नवेगाव धरण, नागझिरा, चुलबंद प्रकल्प, पुजारीटोला, बाजारटोला, परसवाडा, झिलीमिली, आमगावचा नवतलाव, महादेव हिल कॉम्प्लेक्स, झालिया आणि अंजोरा तलाव स्थलांतरित पक्ष्यांसाठी प्रमुख अधिवास आहेत.
पक्षीप्रेमींच्या मते, स्थलांतर केवळ परदेशातून भारतात येणाऱ्या पक्ष्यांपुरते मर्यादित नाही. हवामान आणि अन्नाच्या उपलब्धतेनुसार अनेक भारतीय पक्ष्यांच्या प्रजातीदेखील इतर देशांमध्ये स्थलांतर करतात. अशाप्रकारे, पक्ष्यांचे स्थलांतर ही एक नियमित आणि महत्त्वाची नैसर्गिक प्रक्रिया आहे. दरम्यान गोंदिया जिल्ह्यात आलेल्या पाहुणपक्ष्यांनी निसर्गसोंदर्य वाढविले असून पक्षीप्रेमींमध्ये आनंदाचे वातावरण आहे.
