नक्षलवाद्यांच्या गोळीपासून बचावले, पण अंघोळीसाठी जाताच काळाने गाठले; जवानाचा सर्पदंशाने दुर्दैवी अंत

नक्षलवाद्यांच्या बंदुकीच्या सावटात कर्तव्य बजावत असलेल्या जवानासमोर अचानक वेगळेच संकट उभे ठाकले. अंघोळीसाठी गेलेल्या राहुल शिनगारे यांच्या हाताला विषारी सापाने दंश केला. सहकाऱ्यांनी तातडीने रुग्णालयात नेले, मात्र उपचार सुरू असतानाच त्यांचा दुर्दैवी अंत झाला.

• नक्षलविरोधी मोहिमेवर तैनात जवानाचा विषारी सर्पदंशाने मृत्यू
• रेगडी परिसरात अंघोळीसाठी जाताना राहुल शिनगारे यांना सापाने दंश
• गडचिरोलीत शासकीय इतमामात अंतिम मानवंदना; पार्थिव धुळ्याकडे रवाना 

 

गडचिरोली : नक्षलग्रस्त भागात नक्षलविरोधी मोहिमेवर तैनात असलेल्या धुळे एसआरपीएफ गट क्रमांक सहाचे जवान राहुल प्रभाकर शिनगारे (वय ३७) यांचा विषारी सर्पदंशाने दुर्दैवी मृत्यू झाला. चामोर्शी तालुक्यातील रेगडी परिसरात कर्तव्य बजावत असताना ही घटना घडली. या घटनेमुळे पोलीस दलात हळहळ व्यक्त होत आहे.

अंघोळीसाठी जाताच सापाने दंश केला

मिळालेल्या माहितीनुसार, राहुल शिनगारे हे नक्षलविरोधी मोहिमेसाठी रेगडी परिसरात तैनात होते. कर्तव्य बजावत असताना ते अंघोळीसाठी गेले होते. त्याचवेळी एका विषारी सापाने त्यांच्या हाताला दंश केला. सर्पदंश झाल्याचे लक्षात येताच त्यांच्या सहकारी जवानांनी तातडीने मदत केली आणि त्यांना उपचारासाठी गडचिरोली जिल्हा सामान्य रुग्णालयात दाखल केले.

हेही वाचा: मैत्रिणीच्या माध्यमातून ओळख; कॅफेत नेऊन अत्याचार केल्याचा आरोप, धमकीनंतर गरोदरपणाची तपासणी करण्यासाठी दबाव

उपचार सुरू असतानाच प्रकृती खालावली

रुग्णालयात दाखल केल्यानंतर डॉक्टरांनी राहुल शिनगारे यांच्यावर तातडीने उपचार सुरू केले. मात्र, सर्पदंशातील विषाचा प्रभाव अधिक असल्याने त्यांची प्रकृती गंभीर झाली. डॉक्टरांनी शर्थीचे प्रयत्न करूनही उपचारादरम्यान त्यांची प्राणज्योत मालवली. नक्षलविरोधी मोहिमेत जीवाची पर्वा न करता कर्तव्य बजावणाऱ्या जवानाचा अशा प्रकारे मृत्यू झाल्याने सहकारी जवानांमध्येही शोककळा पसरली.

पोलीस दलाकडून श्रद्धांजली

राहुल शिनगारे यांच्या निधनानंतर गडचिरोली पोलीस कवायत मैदानावर शोकसभा आयोजित करण्यात आली. यावेळी पोलीस अधिकारी आणि जवानांनी शिनगारे यांना श्रद्धांजली अर्पण केली. पोलीस अधीक्षक एम. रमेश यांच्या उपस्थितीत राहुल शिनगारे यांना शासकीय इतमामात अंतिम मानवंदना देण्यात आली.

पार्थिव धुळ्याकडे रवाना

अंतिम मानवंदनेनंतर राहुल शिनगारे यांचे पार्थिव त्यांच्या मूळ गावी धुळे येथे रवाना करण्यात आले. नक्षलविरोधी मोहिमेदरम्यान कर्तव्य बजावत असलेल्या जवानाचा सर्पदंशाने मृत्यू झाल्याने पोलीस दलासह त्यांच्या सहकाऱ्यांमध्ये शोक व्यक्त केला जात आहे. कुटुंबीयांवरही या दुर्दैवी घटनेने दुःखाचा डोंगर कोसळला आहे.