थेट गॅस टँकरमधूनच गॅसचोरी; व्यावसायिक सिलेंडरमध्ये भरला जात होता गॅस

गुप्त माहितीच्या आधारे सहायक जिल्हा पुरवठा अधिकारी संदीप शिंदे व त्यांच्या पथकाने हॉटेल साई यशजवळील मोकळ्या जागेवर सापळा रचला.

छत्रपती संभाजीनगर : एलपीजी गॅससाठी सुरू असलेल्या काळाबाजाराने थेट धोक्याची सीमाच ओलांडल्याचे धक्कादायक वास्तव समोर आले आहे. शहरात गॅस टंचाईची झळ बसत असताना, वैजापूर रोडवरील खोजेवाडी शिवारात मध्यरात्री सुरू असलेल्या अवैध रिफिलिंगच्या अड्ड्यावर राज्यस्तरीय दक्षता पथकाने जणू सर्जिकल स्ट्राईकच केला.

टँकरमधून थेट व्यावसायिक सिलेंडरमध्ये गॅस भरत काळाबाजाराचे युद्ध छेडणाऱ्या रॅकेटला रंगेहात पकडण्यात आले. तब्बल १.२६ कोटींचा मुद्देमाल जप्त करण्यात आला. याप्रकरणी चालक कृष्णा सखाराम दहिफळे (२९, रा. सावरगाव ता. परळी बीड), मेराज मोहम्मद जैश खान (४४, रा. टिटवाळा ता.जि. ठाणे, मुळ रा. संत कबीर नगर, उत्तर प्रदेश), मुख्य सूत्रधार महेश थोरात, टँकर मालक श्रीहर छेदी आणि संबंधित वाहतूकदार यांच्याविरुद्ध विविध कलमांखाली एमआयडीसी वाळूज पोलिस ठाण्यात गुन्हा दाखल करण्यात आला आहे. तर कृष्णा दहिफळे आणि मेराज खान या दोघांना बेड्या ठोकण्यात आल्या आहेत.

गुरुवारी (दि.२) रात्री ९.४५ वाजेच्या सुमारास राज्यस्तरीय दक्षता पथकाला मिळालेल्या, गुप्त माहितीच्या आधारे सहायक जिल्हा पुरवठा अधिकारी संदीप शिंदे व त्यांच्या पथकाने हॉटेल साई यशजवळील मोकळ्या जागेवर सापळा रचला. अधिकाऱ्यांनी काही काळ अंधारात लपून प्रत्यक्ष हालचालींचे निरीक्षण केले. त्यावेळी एलपीजी टँकरमधून रबरी पाईपच्या सहाय्याने थेट सिलेंडरमध्ये गॅस भरला जात असल्याचे दिसून आले. खात्री पटताच पथकाने धाड टाकत कारवाई केली. घटनास्थळी (एमएच-४३-सीके -५९२१) आणि (एमएच-४३-सीके-५७४७) या दोन एलपीजी टँकर संशयास्पद स्थितीत उभे आढळले. त्यापैकी एका टँकरचे अधिकृत सील तुटलेले असल्याचे तपासात उघड झाले.

1 कोटी 26 लाखांचा मुद्देमाल जप्त

टँकरमधील गॅस चोरी करून तोच व्यावसायिक सिलेंडरमध्ये भरून बाजारात विक्रीसाठी तयार केला जात होता. छाप्यात, दोन टँकर, १९ किलो वजनाचे २० व्यावसायिक सिलेंडर (त्यात १७ भरलेले, ३ रिकामे), ५ किलोचे २ भरलेले सिलेंडर, १४ किलोचा १ घरगुती सिलेंडर, तसेच गॅस भरण्यासाठी वापरली जाणारी विशेष रबरी पाईप, मल्टी-व्हॉल्व उपकरणे जप्त करण्यात आली. जप्त करण्यात आलेल्या संपूर्ण मुद्देमालाची किंमत १ कोटी २६ लाख ८७ हजार ९९९ रुपये असल्याची माहिती अधिकाऱ्यांनी सांगितले.

हेदेखील वाचा : LPG टंचाईच्या अफवांवर विश्वास ठेवू नका ! ‘इंडियन ऑइल’चा दररोज २८ लाख सिलिंडरचा पुरवठा; साठेबाजी टाळण्याचे आवाहन