Accident News: हातकणंगलेत धनबाद एक्स्प्रेसची धडक; इयरफोन लावून रुळावरून चालणाऱ्या १७ वर्षीय तरुणीचा मृत्यू

इयरफोन लावून मोबाईलवर बोलत रेल्वे रुळावरून चालत असलेल्या १७ वर्षीय महाविद्यालयीन तरुणीला मागून आलेल्या धनबाद एक्स्प्रेसची धडक बसली. मैत्रिणींनी आरडाओरडा करून सावध करण्याचा प्रयत्न केला; मात्र तोपर्यंत उशीर झाला होता.

• धनबाद एक्स्प्रेसची १७ वर्षीय तरुणीला धडक
• इयरफोनमुळे ट्रेनचा हॉर्न ऐकू आला नाही
• हातकणंगले पोलिसांकडून आकस्मिक मृत्यूची नोंद

 

इचलकरंजी : कानात इयरफोन घालून मोबाईलवर बोलत रेल्वे रुळावरून चालत असलेल्या १७ वर्षीय महाविद्यालयीन तरुणीचा धनबाद एक्स्प्रेसच्या धडकेत मृत्यू झाला. अनुष्का संतोष पोवार (वय १७, रा. इचलकरंजी) असे मृत तरुणीचे नाव आहे. ही घटना बुधवारी सकाळी हातकणंगले रेल्वे स्थानकाजवळ घडली. या घटनेमुळे परिसरात हळहळ व्यक्त होत आहे.

मैत्रिणींसोबत रुळावरून चालत होती

अनुष्का बुधवारी सकाळी दोन मैत्रिणींसोबत हातकणंगले परिसरात आली होती. सकाळी साडेबारा वाजण्याच्या सुमारास तिघी हातकणंगले रेल्वे स्थानकाजवळील रेल्वे रुळावरून चालत जात होत्या. त्यावेळी अनुष्काच्या कानात इयरफोन होते आणि ती मोबाईलवर बोलत होती. त्याचवेळी मागून धनबाद एक्स्प्रेस येत होती.

हेही वाचा: वांद्र्यात नशेचा धिंगाणा; हाताला जोरदार चावा घेतल्याने महिला पोलिसाचा हात रक्तबंबाळ, नेमके प्रकरण काय?

मैत्रिणींनी केला सावध करण्याचा प्रयत्न

धनबाद एक्स्प्रेस जवळ येत असताना तिच्या मैत्रिणींचे लक्ष ट्रेनकडे गेले. त्यांनी अनुष्काला रुळावरून बाजूला होण्याचा इशारा केला. तसेच आरडाओरड करून तिला सावध करण्याचा प्रयत्न केला. मात्र, इयरफोन लावलेले असल्याने आणि ती मोबाईलवर बोलण्यात व्यस्त असल्याने तिला ट्रेनचा हॉर्न किंवा मैत्रिणींचा आवाज ऐकू आला नाही. काही क्षणांतच ट्रेन तिच्याजवळ पोहोचली.

धडकेत रुळाबाहेर फेकली

धनबाद एक्स्प्रेसची अनुष्काला जोरदार धडक बसली. या धडकेत ती रुळाबाहेर फेकली गेली. तिच्या डोक्याला गंभीर दुखापत झाली. घटनेनंतर तिच्या मैत्रिणींनी तसेच स्थानिक नागरिकांनी तातडीने मदत करत तिला उपचारासाठी हातकणंगले ग्रामीण रुग्णालयात दाखल केले.

हेही वाचा: Pune Crime: हत्या कशी करावी ते चौकशीत कसे वागावे; केतन प्रकरणात आरोपींच्या ऑनलाइन सर्चचा खुलासा

उपचारापूर्वीच मृत्यू

रुग्णालयात डॉक्टरांनी अनुष्काची तपासणी केली. मात्र, उपचार सुरू करण्यापूर्वीच तिचा मृत्यू झाल्याचे डॉक्टरांनी घोषित केले. घटनेची माहिती मिळताच हातकणंगले पोलिस ठाण्याच्या पथकाने घटनास्थळी तसेच ग्रामीण रुग्णालयात धाव घेतली. पोलिसांनी घटनास्थळाचा पंचनामा केला. पोलिसांनी मृतदेह ताब्यात घेऊन उत्तरीय तपासणीसाठी पाठवला आहे. या प्रकरणी हातकणंगले पोलिस ठाण्यात आकस्मिक मृत्यूची नोंद करण्यात आली असून, घटनेचा पुढील तपास पोलिस करीत आहेत. या घटनेमुळे अनुष्काच्या कुटुंबीयांवर दुःखाचा डोंगर कोसळला असून, तिच्या मैत्रिणींनाही मोठा धक्का बसला आहे.