पुण्यात तळीरामांची चांदी; दारूबंदीच्या 'त्या' आदेशाला हायकोर्टाची स्थगिती
पुणे : मध्यभागातील म्हणजेच खडक, विश्रामबाग आणि फरासखाना पोलिस ठाण्यांच्या हद्दीत २७ ऑगस्ट ते ६ सप्टेंबर या संपूर्ण गणेशोत्सवाच्या काळात दारू आणि वाईन शॉपीची दुकाने बंद ठेवण्याचा निर्णय घेण्यात आला होता. जिल्हाधिकाऱ्यांनी तसे आदेश देखील पारित केले होते. मात्र, निवडक दारूबंदीविरोधात दाखल झालेल्या याचिकेवर सुनावणी करत उच्च न्यायालयाने हा आदेश फेटाळत स्थगिती दिली. त्यामुळे आता मध्यवर्ती भागातील दुकाने पूर्ण दहा दिवस बंद राहणार नाहीत. त्यानूसार सुधारित आदेश काढण्यात आला आहे.
गणेशोत्सव पुण्याचा आत्मा मानला जातो. या काळात दररोज लाखो भाविक दर्शनासाठी येतात, तर मिरवणुकीच्या दिवशी गर्दी प्रचंड वाढते. अशावेळी दारूच्या नशेत गोंधळ, भांडणे किंवा कायदा-सुव्यवस्थेला बाधा पोहोचणाऱ्या घटना घडू नयेत, यासाठी दरवर्षी काही ठराविक दिवशी दारूबंदी लागू केली जाते. विशेषतः शहराच्या मध्यवर्ती भागात ही दारूबंदी असते. त्यानुसार यंदा शहरासह जिल्ह्यात गणेश आगमन आणि विसर्जन तसेच इतर काही महत्वाच्या दिवशी मद्य विक्री बंद ठेवण्याचे आदेश दिले होते. तर, मध्यवर्ती भागातील तीन पोलिस ठाण्याच्या हद्दीत संपूर्ण गणेशोत्सव कालावधीत दारू विक्री बंद केली होती. मात्र, याबाबत संबंधितांनी उच्च न्यायालयात धाव घेतली. त्यावर सुनावणी होऊन न्यायालयाने याला स्थगिती दिली आहे. त्यामुळे आता मध्यवर्ती भागातील दुकाने संपूर्ण दहा दिवस बंद राहणार नाहीत.
मद्य विक्रीवरील निर्बंध पुण्यातील मध्यवर्ती भागासाठी कायम राहणार आहेत. २७ ऑगस्ट म्हणजेच गणेश चतुर्थी आणि ६ सप्टेंबर म्हणजेच अनंत चतुर्दशी या दोन्ही दिवशी संपूर्ण जिल्ह्यात ड्राय डे जाहीर केला आहे. तसेच ७ सप्टेंबर रोजी विसर्जन मिरवणूक संपेपर्यंत पुणे महापालिका क्षेत्रातील मिरवणुकीच्या मार्गावरील सर्व मद्य विक्री दुकाने बंद ठेवण्याचे आदेश देण्यात आले आहेत. शिवाय ज्या भागात पाचव्या आणि सातव्या दिवशी विसर्जन पार पडते, त्या क्षेत्रातील मिरवणुकीच्या मार्गावरील दुकाने मिरवणुकीदरम्यान बंद ठेवण्याचे आदेशही लागू आहेत. त्यानुसार जिल्हाधिकारी यांनी देखील २६ ऑगस्ट रोजी सुधारित आदेश पारित केले आहेत.
जिल्हाधिकाऱ्यांच्या नव्या आदेशात काय?
.png "Videos"){kind=small}
