विमानांद्वारे ड्रग्ज तस्करीचा नवा डाव! बँकॉक टू पुणे रूट उघड; तब्बल…

गेल्या काही महिन्यात बँकॉक टू पुणे असा ड्रग्जचा रूट उघड झाला असून, कोट्यवधींचे ड्रग्ज कस्टम विभागाने पकडले आहे.

पुणे/अक्षय फाटक : पुण्याचा गल्ली-बोळ ते विमानतळाचा परिसर असा ‘ड्रग्ज’चा वर्तुळ शहरात पुर्ण झालेला असल्याचे गेल्या काही वर्षात सातत्याने समोर आले आहे. एकीकडे पुणे पोलिस गल्ली बोळातून ड्रग्ज शोधत असतानाच कस्टमचा विभाग परदेशातून हवाई-मार्गे येत असलेले ड्रग्ज पकडत आहेत. एकूणच पुण्याच्या वाढत्या औद्योगिककरण अन् विस्तारात ड्रग्जचे जाळे देखील मोठ्या प्रमाणात फोफावत चालले असल्याचे दिसत आहे. गेल्या काही महिन्यात बँकॉक टू पुणे असा ड्रग्जचा रूट उघड झाला असून, कोट्यवधींचे ड्रग्ज कस्टम विभागाने पकडले आहे.

 

पुण्यासह जिल्ह्याचा परिसर वाढत आहे. आयटी क्षेत्र, औद्योगिककरण वाढत आहे. आपसूकच त्यामुळे नागरिककरण देखील मोठ्या संख्येने वाढले आहे. त्यामध्ये उच्चभ्रुपांसून कामगार वर्गांचा समावेश आहे. कामगार वर्गही परराज्यातून सातत्याने पुण्यात स्थलांतरीत होत आहे. तर, परदेशासह विविध राज्यातून तरुण नोकरीनिमित्ताने पुण्यात आला आहे.

या वर्गाला लक्ष करून ड्रग्ज तस्कर देखील त्यांच्या पाठिमागे पुण्यापर्यंत पोहचले आहेत. त्यामुळे शिक्षणाचे माहेरघर म्हणून ओळखल्या जाणाऱ्या शहराचा परिसर या ड्रग्जच्या जाळ्यात अडकला गेला आहे. गेल्या काही वर्षात गल्ली-बोळपासून उच्चभ्रू परिसर तसेच विमानतळाचा परिसर ड्रग्स तस्करीच्या रॅकेटमध्ये पाहिला जात लागला आहे.

नुकतचे सीमा शुल्क विभागाच्या एअर इंटेलिजन्स युनिटने (एआययु) कारवाई करत तब्बल पाच जणांना अटक केली. त्यांच्या बॅगेतून चॉकलेट बॉक्समध्ये लपवून आणलेला तब्बल सुमारे ८ कोटी रुपयांचा गांजा जप्त केला आहे. अटक केलेल्या पाचपैकी चौघे मूळचे झारखंडमधील असून ते बँकॉकहून पुण्यात आले होते. पुणे आंतरराष्ट्रीय विमानतळावर बँकॉकहून येणाऱ्या विमानाने हे ड्रग्ज सातत्याने पुण्यात येत आहेत. कस्टम विभाग हे सातत्याने पकडून हे रॅकेट उघड करत आहेत. हे ड्रग्ज आणण्यासाठी हे तस्कर वेगवेगळ्या क्लुप्त्या वापरत आहेत. मात्र, हे कस्टमच्या नजरेतून सुटत नसल्याचेही दिसत आहे. बँकॉकहून पुण्यात आलेल्या विमानांनंतर येथून देशांतर्गत उड्डाणांद्वारे हा माल देशातील इतर शहरांत पाठवण्याचा तस्करांचा डाव असल्याची शक्यता व्यक्त केली जात आहे. त्यामुळे पुणे शहराला ड्रग्सच्या विळख्यातून बाहेर काढण्यासाठी तपास यंत्रणांसमोर मोठे आव्हान उभे ठाकले आहे.

‘तस्कर’ वेब सिरीजचा प्रकार

नुकत्याच प्रदर्शित झालेल्या आणि चर्चेत असलेल्या ‘तस्कर’ या वेब सिरीजमध्ये दाखविलेल्या पद्धतीप्रमाणेच विमानमार्गे ड्रग्स तस्करी होत असल्याचे समोर येत आहे. पुण्यासारख्या शहरात ही तस्करी होत आहे. थायलंड देशाची राजधानी बँकॉक येथून पुण्याकडे मोठ्या प्रमाणावर अमली पदार्थांची तस्करी केली जात असून, दक्षिण-पूर्व आशियातील पर्यटनासाठी प्रसिद्ध असलेले बँकॉक हे शहर आंतरराष्ट्रीय ड्रग्स माफियांचे केंद्र असल्याचीही चर्चा आहे.

९ मार्च रोजी चॉकलेट बॉक्समधून ८ कोटी रुपयांचा गांजा जप्त करून पाच जणांना अटक केली.

५ मार्च रोजी विमानातील बाथरूममधील टिश्यू कॅबिनेटमध्ये ७४ लाख रुपयांचा गांजा आढळून आला.

१८ फेब्रुवारीला लहान मुलांच्या खेळण्यातून तब्बल ५ कोटी ३२ लाख रुपयांचा गांजा जप्त केला.

१२ डिसेंबर रोजी चिप्सच्या पाकिटांतून ७४ लाख रुपयांचे अमली पदार्थ जप्त, एका महिलेला अटक

८ डिसेंबर रोजी एका प्रवाशाच्या बॅगेतून २ कोटी २९ लाख रुपयांचा गांजा जप्त केला

कस्टमच्या एअर इंटेलिजन्स युनिटने गेल्या वर्षात गांजा, मेफेड्रोनयासह वेगवेगळ्या ड्रग्जप्रकरणात एकूण ६ जणांना अटक केली. यामध्ये गांजात तिघांना पकडून त्यांच्याकडून २९ लाख २० हजारांचा गांजा, तसेच मेफेड्रोन (एमडी) ड्रग्जप्रकरणात दोन जणांना अटक करून १५ लाखांचे ड्रग्ज पकडले. तर, वेगवेगळ्या तीन ड्रग्जमध्ये ६ लाखांचा ऐवज पकडत एकाला अटक केली.

हे सुद्धा वाचा : पिस्तूल मित्रांना दाखविताना गोळी सुटली अन् थेट…; पुण्यातील घटनेनं खळबळ