आयटी इंजिनिअरने केला आईचा गळा आवळून खून
गजानन प्लाझा परिसरातील रिंग रोडजवळील घरात रंजना आणि तुषार हे दोघे राहत होते. तुषार हा माहिती-तंत्रज्ञान क्षेत्रातील अभियंता असून, पुण्यात वास्तव्यास राहून फ्रान्समधील एका बहुराष्ट्रीय कंपनीत काम करत असल्याचे सांगण्यात आले आहे. घरून काम करण्याची सुविधा असल्यामुळे तो अधूनमधून अमरावतीला येत असे. आई आणि मुलामध्ये घरगुती कारणांवरून वारंवार वाद होत होते. शनिवारी सकाळीही दोघांमध्ये किरकोळ कारणावरून वाद झाला. आई आपल्याशी व्यवस्थित बोलत नाही, अशी तुषारची तक्रार असल्याचे समोर आले आहे. वादाचे रूपांतर गंभीर घटनेत झाले. तुषारने आई रंजना यांचा गळा आवळला. यात त्यांचा मृत्यू झाला.
‘ड्रोन’ उडवणं भोवलं ! पुण्यात एमपीएससी आंदोलकांवर पोलिसांची मोठी कारवाई; 5 जणांवर गुन्हा
दरम्यान, घटनेनंतर तुषार स्वतः गाडगेनगर पोलिस ठाण्यात पोहोचून त्याने आईच्या हत्येची माहिती दिल्याचे वृत्त आहे. पोलिसांनी घटनास्थळी जाऊन पंचनामा केला आणि मृतदेह शवविच्छेदनासाठी जिल्हा सामान्य रुग्णालयात पाठवला. याप्रकरणी तुषारला अटक करण्यात आली. हत्येमागील नेमकी पार्श्वभूमी तपासली जात आहे. घरातील मतभेद इतक्या टोकाला पोहोचल्याने परिसरात हळहळ व्यक्त होत आहे. पोलिसांच्या पुढील तपासातून या घटनेतील अन्य बाबी स्पष्ट होणार आहेत.
आई काहीतरी लपवत असल्याचा संशय
तुषारचे वडील हयात नाहीत. त्याचा भाऊ मोर्शी तालुक्यातील मूळ गावी राहतो. घरात मुलगा आणि आई दोघेच राहत होते. तुषार काही दिवासांपासून घरूनच नोकरी करत होता. त्याचे वार्षिक पॅकेज तब्बल २० लाख असल्याचे सांगण्यात येत आहे. काही दिवसांपासून माय-लेकात खटके उडत होते. आई आपल्यापासून काही तरी लपवत आहे आणि चुकीच्या गोष्टी सांगत आहे, असा संशय तुषारच्या मनात बळावला होता. याच रागाच्या भरात शनिवारी त्याने टोकाचे पाऊल उचलत आईचा गळा आवळून खून केला.
.png "Videos"){kind=small}
