भारतीय नागरिक नसतानाही कल्याणमध्ये वास्तव्य कसे? कागदपत्रांच्या सखोल चौकशीची महिलेची मागणी
Kalyan Crime News: कल्याणमधून एक धक्कादायक घटना समोर आली असून, शेजारी राहणाऱ्या व्यक्तीकडून त्रास दिला जात असल्याच्या आरोपातून सुरू झालेल्या एका तक्रारीने संबंधित व्यक्तीच्या नागरिकत्वाबाबत प्रश्न उपस्थित केले आहेत. सलमा खान नावाच्या महिलेने कल्याणमधील बाजारपेठ पोलीस ठाण्यात याबाबत तक्रार दाखल केली आहे. या तक्रारीत महिलेने शेजारी राहणाऱ्या हनीफ गॅरेजवाला याच्यावर गंभीर आरोप केले आहेत. संबंधित व्यक्ती भारतीय नागरिक नसून आफ्रिकन नागरिक असल्याचा दावा महिलेने केला आहे. तसेच त्याने बनावट कागदपत्रे तयार करून भारतात वास्तव्य केल्याचा आरोपही तक्रारीत करण्यात आला आहे.
तक्रार प्राप्त झाल्यानंतर बाजारपेठ पोलिसांनी प्रकरणाची चौकशी केली. तक्रारदार महिलेच्या म्हणण्यानुसार, चौकशीनंतर संबंधित व्यक्ती भारतीय नागरिक नसल्याचे नमूद करणारे पत्र पोलिसांनी तिला दिले आहे. मात्र, संबंधित व्यक्तीचे नेमके राष्ट्रीयत्व, भारतातील त्याच्या वास्तव्याचा कायदेशीर दर्जा आणि त्याच्याकडील कागदपत्रांची वैधता याबाबत अधिकृत तपासाचा अंतिम निष्कर्ष उपलब्ध झालेला नाही.
संबंधित व्यक्ती भारतीय नागरिक नसल्याचे चौकशीत आढळले असेल, तर तो भारतात कोणत्या आधारावर वास्तव्य करत होता, असा प्रश्न तक्रारदार महिलेने उपस्थित केला आहे. त्याच्याकडे आधार कार्ड, मतदार ओळखपत्र किंवा अन्य भारतीय कागदपत्रे असल्यास ती वैध आहेत का, याचीही तपासणी करण्याची मागणी करण्यात आली आहे.
कागदपत्रे बनावट असल्याचे आढळल्यास ती कुठे आणि कशा पद्धतीने तयार करण्यात आली, त्यासाठी आणखी कोणाची मदत घेण्यात आली आणि संबंधित नोंदी शासकीय यंत्रणेत कशा झाल्या, याची सखोल चौकशी व्हावी, अशी तक्रारदाराची मागणी आहे.
संबंधित व्यक्तीच्या भारतातील वास्तव्याची कागदपत्रे आणि नागरिकत्वाशी संबंधित सर्व बाबींची पडताळणी करून दोष आढळल्यास कायद्यानुसार कारवाई करण्यात यावी, अशी मागणी महिलेने केली आहे.
.png "Videos"){kind=small}
