चोरलेली दुचाकी घेऊन फिरणारा जेरबंद; कराड पोलिसांची मोठी कारवाई

सांगली जिल्ह्यातून चोरलेली दुचाकी घेऊन फिरणाऱ्यास पोलिसांनी ताब्यात घेतले आहे. पोलिसांनी चोरट्याकडून दुचाकी हस्तगत केली आहे.

कराड : सांगली जिल्ह्यातून चोरलेली दुचाकी घेऊन फिरणाऱ्यास पोलिसांनी ताब्यात घेतले आहे. पोलिसांनी चोरट्याकडून दुचाकी हस्तगत केली आहे. कराड शहर वाहतूक पोलिसांच्या सतर्कतेमुळे हा गुन्हा उघडकीस आला आहे. निरंजन सोमनाथ साळुंखे (वय २२, मूळ रा. मासाळ टेक, म्हसवड, ता. माण (सध्या रा. खोडशी, ता. कराड) असे पोलिसांनी ताब्यात घेतलेल्याचे नाव आहे.

पोलिसांनी दिलेल्या माहितीनूसार, कराड शहर वाहतूक शाखेतील पोलीस उपनिरीक्षक संतोष जगदाळे व कर्मचारी ओंकार शिंदे बुधवारी दुपारी बसस्थानक परिसरात कर्तव्य बजावत असताना एक दुचाकी त्यांनी अडवली. संबंधित दुचाकीला नंबरप्लेट नव्हती. त्यामुळे त्यांनी चालक निरंजन साळुंखे याच्याकडे दुचाकीच्या कागदपत्राबाबत विचारणा केली. त्यावेळी त्याने उडवाउडवीची उत्तरे दिली. संशय आल्यामुळे वाहतूक पोलिसांनी ती दुचाकी ताब्यात घेतली. चालक निरंजन साळुंखे यालाही ताब्यात घेण्यात आले.

पोलीस उपअधिक्षक अमोल ठाकूर व वाहतूक शाखेचे प्रभारी सहाय्यक निरीक्षक संदीप सुर्यवंशी यांच्या मार्गदर्शनाखाली पोलिसांनी दुचाकीच्या चेसी व इंजिन क्रमांकावरून परिवहन कार्यालयाकडून माहिती घेतली असता संबंधित दुचाकी भिलवडी स्टेशन येथील संतोष गाडे यांच्या मालकीची असल्याचे स्पष्ट झाले. पोलिसांनी त्यांच्याकडून माहिती घेतली असता ती दुचाकी मे २०२४ मध्ये चोरीस गेली असून, भिलवडी पोलीस ठाण्यात याबाबत गुन्हा दाखल असल्याचे स्पष्ट झाले. त्यानुसार पोलिसांनी ताब्यात घेतलेल्या संशयितास दुचाकीसह भिलवडी पोलिसांच्या ताब्यात देण्यात आले.

हे सुद्धा वाचा : पुणे पोलिसांची मोठी कारवाई; तब्बल 84 लाखांचे अमली पदार्थ जप्त

कारची काच फोडून चोरी

राज्यात चोरट्यांनी धुमाकूळ घातला आहे. राज्यातील वेगवेगळ्या भागातून चोरीच्या घटना उघडकीस येत असतात. अशातचं आता विमाननगर परिसरात रस्त्याच्या कडेला लावलेल्या कारची काच फोडून चोरट्यांनी तब्बल दहा लाख ५१ हजार रुपयांची रोकड चोरुन नेल्याची धक्कादायक घटना उघडकीस आली आहे. व्यावसायिकाने याबाबत तक्रार दिली असून, या चोरट्यांनी पाळत ठेवून चोरी केल्याचा संशय आहे. याप्रकरणी नितेशकुमार राजकुमार शहा (वय ३४, रा. चारकोप, कांदिवली, मुंबई) यांनी विमानतळ पोलीस ठाण्यात तक्रार दिली आहे. त्यानूसार चोरट्यांवर गुन्हा दाखल करण्यात आला आहे. पोलिसांच्या माहितीनुसार, शहा व्यावसायिक आहेत. ते कामानिमित्त मुंबईहून विमाननगर येथे आले होते. तेव्हा विमाननगर भागातील वाटिका सोसायटीसमोर त्यांनी रविवारी रात्री कार लावली. नंतर ते कामाच्या ठिकाणी गेले. त्यावेळी चोरट्यांनी कारची काच फोडली. कारमधील पिशवीत ठेवलेली साडेदहा लाखांची रोकड चोरुन पोबारा केला. घटना लक्षात येताच त्यांनी पोलिसांकडे धाव घेऊन तक्रार दिली.