संग्रहित फोटो
पुणे : पुणे शहरात गुन्हे शाखेच्या पथकाने दोन वेगवेगळ्या कारवायांमध्ये तब्बल ८४ लाखांचे अमली पदार्थ जप्त केले आहे. कोरेगाव पार्क आणि लोणी काळभोर परिसरात या कारवाया करण्यात आल्या आहेत. गेल्या काही दिवसांमधील ही मोठी कारवाई मानली जात आहे.
पहिली कारवाई कोरेगाव पार्क येथे करण्यात आली असून, याप्रकरणी पोलिसांनी प्रणव नवीन रामनानी (19, रा. बंडगार्डन) आणि गौरव मनोज दोडेजा (19, रा. कोरेगावपार्क) याना पकडले. त्यांच्या ताब्यातून 67 लाख 8 हजारांचा 2 ग्रॅम 78 मिली ग्रॅम कोकेन जप्त करण्यात आले. तर 136 ग्रॅम 64 मिली गॅ्रम ओजीकुश गांजा जप्त करण्यात आला. यावेळी दोन महागड्या कारही जप्त करण्यात आल्या. याप्रकरणी कोरेगाव पार्क पोलीस ठाण्यात गुन्हा दाखल करण्यात आला आहे.
कोरेगावपार्क परिसरात अमली पदार्थ विरोधी पथक एक हद्दीत पेट्रोलिग करत होते. त्यावेळी पोलीस अमंलदार संदीप शिर्के यांना येथील क्लोअर गार्डन सोसायटी परिसरात प्रणव आणि गौरव यांच्याबाबत माहिती मिळाली. त्यांना ताब्यात घेऊन पोलिसांनी 67 लाख 8 हजारांचा 2 ग्रॅम 78 मिली ग्रॅम कोकेन जप्त केले. तर तसेच 136 ग्रॅम 64 मिली गॅ्रम ओजीकुश गांजा जप्त करण्यात आला. यावेळी दोन महागड्या कारही जप्त करण्यात आल्या.
तर दुसर्‍या कारवाईत अमंली पदार्थ विरोधी पथक दोनचे वरिष्ठ निरीक्षक सुदर्शन गायकवाड त्यांच्या अमंलदारांसह लोणी काळभोर परिसरात गस्त घालत होते. यावेळी पोलीस अमंलदार योगेश मांढरे यांना एक राजस्थानी व्यक्ती गांजा विक्रीसाठी येणार असल्याची माहिती मिळाली. यावेळी पथकाने लोणकर वस्ती येथील ज्ञानाई बंगल्यासमोरील सार्वजनिक रस्त्यावरून भरतकुमार दानाजी राजपुरोहीत (35) आणि आशुसिंग गुमानसिंग (दोघेही रा. जालोर, राजस्थान) यांना ताब्यात घेऊन चौकशी केली. त्यांच्याकडून तब्बल 40 किलो 390 ग्रॅम गांजा जप्त करण्यात आला. त्यांच्यावर लोणी काळभोर पोलीस ठाण्यात गुन्हा दाखल करण्यात आला.
ही कारवाई अपर आयुक्त शैलेश बलकवडे यांच्या मार्गदर्शनाखाली पोलीस निरीक्षक सुदर्शन गायकवाड, सहायक निरीक्षक अनिकेत पोटे, उपनिरीक्षक दिगंबर कोकाटे व त्यांच्या पथकाने केली.
हे सुद्धा वाचा : पुणे पोलीस अ‍ॅक्शन मोडवर; आता सायबर गुन्हेगारांना रोखण्यासाठी काढला तोडगा
गांजा विक्रीसाठी आलेल्या दोघांना ठोकल्या बेड्या
दरम्यान गेल्या काही दिवसाखाली पुणे शहराच्या मध्यभागात गांजा विक्री करण्यासाठी आलेल्या दोन तरुणांना गुन्हे शाखेच्या पोलिसांनी सापळा रचून अटक केली. त्या दोघांकडून ८२० ग्रॅम गांजा जप्त केला असून, युनिट एकच्या पथकाने ही कारवाई शुक्रवार पेठेत केली आहे. समाधान केदा पवार (वय ३३, रा. नाशिक), संदीप सखाराम खैरनार (वय ३८, रा. पिंपरी) असे अटक करण्यात आलेल्या दोघांची नावे आहेत. याप्रकरणी खडक पोलीस ठाण्यात गुन्हा नोंदविण्यात आला आहे. ही कारवाई वरिष्ठ निरीक्षक शब्बीर सय्यद, पोलीस अंमलदार सुजय रिसबुड व त्यांच्या पथकाने केली आहे.
