पुण्यातील वारजेत गॅस सिलेंडरचा भीषण स्फोट; दोघांचा मृत्यू, संपूर्ण घर जळून खाक (Photo : Blast)
पुणे : पुणे शहरातील वारजे भागात गॅस सिलेंडरचा भीषण स्फोट झाला. या भीषण स्फोटात दोघांचा होरपळून मृत्यू झाल्याची माहिती आहे. हा स्फोट इतका भीषण होता की, यामध्ये मोठी आगही लागली होती. स्फोटानंतर लागलेल्या आगीत संपूर्ण घर जळून खाक झाले. बुधवारी (दि.9) रात्री दोनच्या सुमारास हा स्फोट झाला.
वारजे येथे पत्र्याच्या घरात सिलेंडरचा स्फोट झाला. हा स्फोट इतका भीषण होता की, सिलेंडरचे सर्व भाग वेगळे झाले. सिलेंडर पाच-सहा भागात फुटला असून, या स्फोटात घरातील सर्व भांडी, इतर सामान, संपूर्ण घर उद्धवस्त झालं आहे. इतकेच नाहीतर सिलेंडरची वरची रिंगदेखील सिलेंडरपासून वेगळी होत उडाली. यानंतर लागलेल्या आगीत संपूर्ण घर जळून खाक झाले. सिलेंडरच्या स्फोटात गॅसदेखील पूर्णपणे फुटला असून, त्याचे विविध भागात तुकडे झाले आहेत. पत्र्यांचं बांधकाम असलेल्या घराचे पत्रे पूर्णपणे उडाले आहेत.
दरम्यान, या स्फोटाची माहिती अग्निशमन दलाला मिळताच त्यांनी तात्काळ घटनास्थळी धाव घेतली. अग्निशमन दलाने स्फोटात लागलेली आग विझवण्याचे काम तातडीने सुरू केले. अग्निशमन दलाच्या जवानांनी पाण्याचा मारा करत गॅस सिलेंडरच्या स्फोटात लागलेली आग विझवली. यावेळी घरामध्ये दोन पुरुष जखमी अवस्थेत आढळले. त्या दोन जखमी व्यक्तींना पोलिसांच्या मदतीने रुग्णवाहिकेतून तात्काळ रुग्णालयात दाखल करण्यात आलं.
वारजे येथील गोकुळनगर येथे घडली घटना
वारजे माळवाडी येथे सर्व्हे नंबर 52 गोकुळनगर येथील एका पत्र्याच्या घरात बुधवारी मध्यरात्री सिलेंडरचा भीषण स्फोट झाला. बुधवारी रात्री एक वाजून 56 मिनिटांनी सिलेंडरचा स्फोट झाला. या स्फोटात दोन जणांचा होरपळून दुर्दैवी मृत्यू झाल्याची माहिती आहे.
