गुरुवार, 22 ऑक्टोबर 2026
सौजन्य फोटो - नवराष्ट्र टीम
जुन्या वादातून हल्ला
मिळालेल्या माहितीनुसार, मिरा रोड पोलिस ठाण्याच्या हद्दीतील गोकुळ व्हिलेज परिसरात रात्रीच्या सुमारास ही घटना घडली. सनी आणि साहिल वारसी यांच्यात यापूर्वी वाद झाला होता. याच जुन्या वादातून साहिल वारसी ऊर्फ जानू आणि त्याच्या पत्नीने सनीचा पाठलाग केल्याचे सांगण्यात येत आहे.
चॉपरने मानेवर वार
पोलिसांच्या माहितीनुसार, आरोपींनी एका मित्राच्या मदतीने सनीला पकडले. त्यानंतर त्याच्यावर चॉपरने हल्ला करत मानेवर वार करण्याचा प्रयत्न केल्याचा आरोप आहे. मात्र, सनीने प्रसंगावधान राखून वार चुकविण्याचा प्रयत्न केला. त्यामुळे चॉपरचा वार त्याच्या खांद्यावर बसला. या हल्ल्यात त्याच्या खांद्याला गंभीर दुखापत झाली. घटनेनंतर जखमी सनीला तातडीने उपचारासाठी रुग्णालयात दाखल करण्यात आले. सध्या त्याची प्रकृती स्थिर असून, त्याच्यावर उपचार सुरू असल्याची माहिती आहे.
पती-पत्नी विरोधात गुन्हा दाखल
दरम्यान, हल्ल्याची माहिती मिळताच मिरा रोड पोलिसांनी घटनास्थळी धाव घेतली आणि घटनेची माहिती घेतली. या प्रकरणी साहिल वारसी ऊर्फ जानू आणि त्याच्या पत्नीविरोधात मिरा रोड पोलिस ठाण्यात गुन्हा दाखल करण्यात आला आहे. भारतीय दंड संहितेच्या कलम ३२६ अंतर्गत गुन्हा दाखल असल्याची माहिती आहे. दोन्ही आरोपी सध्या फरार असून, पोलिस त्यांचा शोध घेत आहेत.
हल्यामागे नेमके कारण काय?
हल्ल्यामागील जुन्या वादाचे नेमके कारण काय होते, घटनेत आणखी कोणाचा सहभाग होता का आणि हल्ल्यापूर्वी आरोपींनी काही नियोजन केले होते का, याचा तपास पोलिसांकडून सुरू आहे. आरोपींच्या अटकेनंतर या प्रकरणातील अधिक माहिती समोर येण्याची शक्यता आहे. जुन्या वादातून चॉपरसारख्या धारदार शस्त्राने हल्ला झाल्याने मिरा रोड परिसरातील कायदा-सुव्यवस्थेचा प्रश्न पुन्हा ऐरणीवर आला आहे.
