(फोटो सौजन्य: Gemimi)
राजेंद्र पेंडुरकर (वय ५७, रा. लोअर परळ) असे अटक करण्यात आलेल्या आरोपी कर्मचाऱ्याचे नाव आहे. ही चोरीची घटना शुक्रवारी उघडकीस आली. मंदिरातील सीसीटीव्ही फुटेज तपासले जात असताना, पेंडुरकर हे दानपेटीतून अत्यंत चलाखीने पैसे काढताना दिसले. हा प्रकार लक्षात येताच मंदिर प्रशासनातील वरिष्ठ अधिकाऱ्यांना याची माहिती देण्यात आली.
धक्कादायक बाब म्हणजे, आरोपीने ही चोरी एकदाच केली नव्हती. मंदिर ट्रस्टने मागील ८ ते १० दिवसांचे सीसीटीव्ही फुटेज तपासले असता, आरोपी वारंवार दानपेटीवर डल्ला मारत असल्याचे स्पष्ट झाले. यानंतर ट्रस्टने तातडीने दादर पोलीस ठाण्यात धाव घेऊन अधिकृत तक्रार दाखल केली. पोलिसांनी तपास करून आरोपीला ताब्यात घेतले असून, न्यायालयाने त्याला पोलीस कोठडी सुनावली आहे.
प्राथमिक चौकशीत आरोपीने सुमारे १०,००० रुपये चोरल्याची कबुली दिली आहे. मात्र, सीसीटीव्हीमधील पुरावे पाहता त्याने गेल्या अनेक दिवसांपासून अशा प्रकारे पैसे चोरले असावेत, असा संशय पोलिसांनी व्यक्त केला आहे. त्यामुळे चोरी झालेली एकूण रक्कम मोठी असण्याची शक्यता वर्तवण्यात येत असून, या गुन्ह्यात मंदिरातील आणखी काही कर्मचारी सहभागी आहेत का, याचाही शोध पोलीस घेत आहेत.
सिद्धिविनायक मंदिर हे केवळ मुंबईतीलच नव्हे, तर देशातील सर्वात श्रीमंत आणि सुरक्षित मंदिरांपैकी एक मानले जाते. येथे दररोज हजारो भाविकांसह राजकीय नेते, चित्रपट कलाकार आणि खेळाडू दर्शनासाठी येत असतात. नुकतेच भारतीय क्रिकेट संघाचा कर्णधार सूर्यकुमार यादव आणि प्रशिक्षक गौतम गंभीर यांनीही येथे दर्शन घेतले होते. अशा उच्च सुरक्षा असलेल्या ठिकाणी मंदिराच्याच कर्मचाऱ्याने चोरी केल्यामुळे भाविकांमध्ये संतापाची लाट आहे. सध्या दादर पोलीस या प्रकरणाचा सखोल तपास करत असून, मंदिर प्रशासनानेही अंतर्गत सुरक्षा व्यवस्थेचा सविस्तर आढावा घेण्याचं ठरवलं आहे.
.png "Videos"){kind=small}
