भरधाव वाहनाची दुचाकीला जोरदार धडक; एकाचा जागीच मृत्यू

भरधाव वाहनाच्या धडकेत दुचाकीस्वाराचा मृत्यू झाल्याची घटना नगर रस्त्यावरील अष्टापूर भागात घडली आहे. शिवाजी उत्तम खोत (वय ५७, रा. दत्तवाडी, उरळी कांचन, पुणे-सोलापूर रस्ता) असे मृत्यू झालेल्या दुचाकीस्वाराचे नाव आहे.

पुणे : राज्यात अपघाताचे प्रमाण मोठ्या प्रमाणात वाढले आहे. राज्यातील वेगवेगळ्या भागातून अपघाच्या घटना उघडकीस येत असतात. अशातचं आता भरधाव वाहनाच्या धडकेत दुचाकीस्वाराचा मृत्यू झाल्याची घटना नगर रस्त्यावरील अष्टापूर भागात घडली आहे. शिवाजी उत्तम खोत (वय ५७, रा. दत्तवाडी, उरळी कांचन, पुणे-सोलापूर रस्ता) असे मृत्यू झालेल्या दुचाकीस्वाराचे नाव आहे. याबाबत बालाजी विलास खोत (वय ४३, रा. दत्तवाडी, उरळी कांचन, पुणे-सोलापूर रस्ता) यांनी लोणीकंद पोलीस ठाण्यात तक्रार दिली आहे. त्यानूसार, वाहनचालकावर गुन्हा दाखल करण्यात आला आहे.

पोलिसांच्या माहितीनुसार, दुचाकीस्वार शिवाजी खोत हे १७ जानेवारी रोजी सायंकाळी सहाच्या सुमारास नगर रस्ता भागातील अष्टापूर ते उरळी कांचन रस्त्याने निघाले होते. त्यावेळी भरधाव वाहनाने दुचाकीस्वार खोत यांना धडक दिली. अपघातानंतर घटनास्थळी न थांबता वाहनचालक पसार झाला. गंभीर जखमी झालेल्या खोत यांचा उपचारांपूर्वीच मृत्यू झाला होता. पोलीस उपनिरीक्षक तुकाराम सुरवसे अधिक तपास करत आहेत.

हे सुद्धा वाचा : पुणे पोलिसांची मोठी कारवाई; चोरी करुन पळून गेलेल्या चोरट्याला पकडले

दीर- भावजयचा मृत्यू

पुण्यातील जेल रोडवरील एका रुग्णालयासमोर गेल्या काही दिवसाखाली भरधाव कारने दिलेल्या धडकेत दीर भावजयीचा मृत्यू झाल्याची घटना घडली आहे. लोहगाव परिसरातील जेल रस्त्यावरील संजय पार्क येथे हा अपघात गुरूवारी सकाळी झाला. याप्रकरणी चालकावर गुन्हा दाखल करण्यात आला आहे. आशीर्वाद गोवेकर (वय ५२), रेश्मा गोवेकर (वय ४७) असे अपघातात मृत्युमुखी पडलेल्या दाम्पत्याचे नाव आहे. याप्रकरणी कारचालक अचलकुमार (वय ४३) याच्यावर गुन्हा दाखल करण्यात आला. याबाबत प्रसाद गोवेकर (वय ५४, रा. शिव पार्वती मंगल कार्यालयाजवळ, गोकुळनगर, कात्रज-कोंढवा रस्ता) यांनी विमानतळ पोलीस ठाण्यात तक्रार दिली आहे.

महिला पोलिसाला कारने उडवले

राज्यात अपघाताचे प्रमाण मोठ्या प्रमाणात वाढले आहे. दरम्यान गेल्या काही दिवसाखाली ड्रंक अँड ड्राईव्हच्या कारवाईनिमित्त नाकाबंदी करून कारवाई करत असताना एका भरधाव आलिशान कारने कर्तव्य बजावणाऱ्या वाहतूक विभागातील महिला कर्मचाऱ्याला उडविल्याची धक्कादायक घटना घडली. यात महिला कर्मचारी गंभीररित्या जखमी झाल्या असून, त्यांच्यावर खासगी रुग्णालयात उपचार सुरू आहेत. दरम्यान, आलिशान कारमध्ये चौघेजन असल्याचे माहिती समोर आली. महिला अंमलदार दीपमाला राजू नायर (वय ३५) असे गंभीर जखमी झालेल्या महिला कर्मचाऱ्याचे नाव आहे. याप्रकरणी बंडगार्डन पोलीस ठाण्यात अज्ञात चालकाविरोधात गुन्हा दाखल करण्यात आला आहे.