Beed Crime News: जुन्या वादातून परळीत भाजप नेत्याच्या पुतण्यावर प्राणघातक हल्ला; सात जणांवर गुन्हा
परळी : जिल्ह्यातील कायदा आणि सुव्यवस्थेच्या परिस्थितीवर चिंता व्यक्त होत असतानाच परळीत भरवस्तीत झालेल्या प्राणघातक हल्ल्याने खळबळ उडाली आहे. परळी नगरपरिषदेतील भाजपचे गटनेते तथा सभापती पवन मुंडे यांचे पुतणे कृष्णा मुंडे यांच्यावर १५ ते १६ जणांच्या टोळक्याने धारदार शस्त्रांनी हल्ला केल्याची घटना समोर आली आहे. जुन्या वादातून हा हल्ला झाल्याची प्राथमिक माहिती असून, या हल्ल्यात कृष्णा मुंडे जखमी झाले आहेत. त्यांच्यावर रुग्णालयात उपचार सुरू आहेत. भरवस्तीत घडलेल्या या घटनेमुळे परिसरातील नागरिकांमध्ये भीतीचे वातावरण निर्माण झाले असून, शहरातील कायदा-सुव्यवस्थेवर पुन्हा प्रश्नचिन्ह निर्माण झाले आहे.
मिळालेल्या माहितीनुसार, जुन्या वादाची कुरापत काढून हल्लेखोरांनी कृष्णा मुंडे यांना एकटे गाठले. परिस्थिती लक्षात येताच कृष्णा मुंडे यांनी तेथून पळून जाण्याचा प्रयत्न केला. मात्र, हल्लेखोरांनी त्यांचा पाठलाग सुरू केला. ‘सोडू नका याला, मारा!’ असा आरडाओरडा करत टोळक्याने त्यांना गाठले आणि दगड, लाथाबुक्क्या तसेच धारदार शस्त्रांनी मारहाण केली. अचानक झालेल्या या हल्ल्यामुळे परिसरात काही काळ गोंधळाचे वातावरण निर्माण झाले. या हल्ल्यात कृष्णा मुंडे जखमी झाले असून त्यांच्यावर वैद्यकीय उपचार सुरू आहेत. दरम्यान, हल्ल्याचा संपूर्ण प्रकार जवळच्या सीसीटीव्ही कॅमेऱ्यात कैद झाला आहे. या घटनेचा व्हिडिओ सोशल मीडियावर मोठ्या प्रमाणात व्हायरल होत आहे.
घटनेनंतर पोलिसांनी प्रकरणाची गंभीर दखल घेत तपास सुरू केला आहे. याप्रकरणी परळी शहर पोलिस ठाण्यात सात जणांविरोधात विविध कलमांनुसार गुन्हा दाखल करण्यात आला आहे. रवी हनुमंत फड, सतीश हनुमंत फड, संदीप सोनवणे, विशाल सारणीकर, महेश कांता शिंदे, बालाजी दहिफळे आणि भागवत साबळे अशी गुन्हा दाखल झालेल्या आरोपींची नावे आहेत. पोलिसांकडून घटनास्थळावरील परिस्थिती तसेच सीसीटीव्ही फुटेज तपासले जात असून, हल्ल्यात सहभागी असलेल्या इतर व्यक्तींचीही माहिती घेतली जात आहे. आरोपींना ताब्यात घेण्यासाठी पोलिसांकडून प्रयत्न सुरू आहेत. भररस्त्यात एवढ्या मोठ्या टोळक्याने केलेल्या हल्ल्यामुळे परळी शहरातील नागरिकांमध्ये संतापाचे वातावरण असून, या घटनेच्या पार्श्वभूमीवर पोलिसांच्या कारवाईकडे लक्ष लागले आहे.
.png "Videos"){kind=small}
