‘फायटर’ कोंबड्यांच्या झुंजीवर जुगार, सहा जणांना ठोकल्या बेड्या; लाखोंचा मुद्देमाल जप्त

पुण्यातील वानवडीत कोंबड्यांची झुंज लावून त्यावर जुगार खेळण्याचा प्रकार उघडकीस आला आहे. वानवडी पोलिसांनी कारवाई करुन ६ जणांना अटक केली आहे.

• ‘फायटर’ कोंबड्यांच्या झुंजीवर जुगार
• सहा जणांना ठोकल्या बेड्या
• लाखो रुपयांचा मुद्देमाल जप्त

पुणे : पुण्यातील वानवडीत कोंबड्यांची झुंज लावून त्यावर जुगार खेळण्याचा प्रकार उघडकीस आला आहे. वानवडी पोलिसांनी कारवाई करुन ६ जणांना अटक केली आहे. आरोपींकडून झुंजीसाठी वापरलेले ६ कोंबडे, पाच मोबाइल, तीन दुचाकी, पिशव्या, दोन हजार ५८० रुपये असा ५ लाख ११ हजार रुपयांचा मुद्देमाल जप्त केला आहे. पुण्यातील घोरपडीतील एम्प्रेस गार्डनपासून काही अंतरावर मोकळ्या जागेत कोंबड्यांच्या झुंजीवर जुगार खेळला जात होता.

अमोल सदाशिव खुर्द (वय ४७, रा. रविवार पेठ), मंगेश अप्पा चव्हाण (वय ५५, रा. भवानी पेठ), निखील मनीष त्रिभुवन (वय २०, रा. घोरपडी), सचिन सदाशिव कांबळे (वय ४२, रा. भवानी पेठ), प्रणेश गणेश पॅरम (वय २७, रा. लष्कर) अशी अटक करण्यात आलेल्यांची नावे आहेत. याप्रकरणी ६ आरोपींवर महाराष्ट्र जुगार प्रतिबंधक कायदा, तसेच प्राण्यांना क्रुरतेने वागणूक देणे अधिनियम कलम ११ (इ), (न) अन्वये गुन्हा दाखल करण्यात आला आहे. ही कारवाई वरिष्ठ निरीक्षक भाऊसाहेब पाटील, गुन्हे शाखेचे निरीक्षक विजयकुमार डोके, सहायक निरीक्षक उमाकांत महाडिक, अमोल पिलाणे, अतुल गायकवाड व त्यांच्या पथकाने केली आहे. अटक करण्यात आलेल्या आरोपींना न्यायालायत हजार करण्यात आले. न्यायालायने त्यांना न्यायालयीन कोठडीत ठेवण्याचे आदेश दिले.

घोरपडीतील एम्प्रेस गार्डन परिसरातील एका बंगल्याजवळ असलेल्या माेकळ्या जागेत कोबड्यांची झुंज लावून त्यावर जुगार खेळण्यात येत असल्याची माहिती वानवडी पोलीस ठाण्याच्या तपास पथकातील पोलीस कर्मचारी गोपळ मदने आणि अमोल पिलाणे यांना मिळाली. त्यानंतर पोलिसांच्या पथकाने तेथे कारवाई केली. त्यावेळी तेथे कोंबड्यांच्या झुंजीवर जुगार खेळण्यात येत असल्याचे दिसून आले.

तंगुसपासून बनवलेल्या पिशव्या

आरोपी कोंबड्यांची झुंज बघण्यासाठी आलेल्या काही जणांना पैसे लावण्यास सांगत होते. पोलिसांनी सहा जणांना अटक केली आहे. त्यांनी शहरातील अन्य ठिकाणी कोंबड्यांची झुंज लावल्याचा संशय असून, त्यादृष्टीने तपास करण्यात येत आहे. कोंबड्यांची ने- आण करण्यासाठी त्यांनी तंगुसपासून बनविलेल्या पिशव्यांचा वापर केल्याचे आढळून आले आहे.