खासगी यू ट्यूबच्या माध्यमातून पेपर फोडले; तीन खासगी क्लासेसची नावे आली समोर

तीसरी ते नववीच्या परिक्षेचे पेपर व त्यांची उत्तरे परवानगी न घेता प्रसारीत झाली असल्याचे समोर आले आहे. याप्रकरणी गुन्हा दाखल करण्यात आला आहे.

पुणे : पुण्यातून एक मोठी बातमी समोर आली आहे. महाराष्ट्र राज्य शिक्षण परिषदेतर्फे आयोजित केल्या जाणार्‍या तीसरी ते नववीच्या परिक्षेचे पेपर व त्यांची उत्तरे राज्य शैक्षणिक संशोधन व प्रशिक्षण परिषदेची कोणतीही परवानगी न घेता प्रसारीत झाली असल्याचे समोर आले आहे. हे पेपर खासगी यु ट्यूब चॅनेलवरून फोडण्यात आले आहेत. याप्रकरणी विश्रामबाग पोलिस ठाण्यात गुन्हा दाखल करण्यात आला आहे. या पेपरफुटीमुळे मोठी खळबळ उडाली आहे.

कैलासन सर मॅथ्स, म मराठी, एस. जे. ट्युशन क्लासेस या तीन खासगी युट्युब चॅनलची नावे प्राथमिक तपासात समोर आली आहेत. याबाबत सहायक संचालक संगिता प्रभाकर शिंदे (५०, रा. हडपसर) यांनी दिलेल्या तक्रारीवरून गुन्हा दाखल करण्यात आला आहे. हा प्रकार ६ ऑगस्ट २०२५ रोजी साडे बारा वाजण्याच्या सुमारास निदर्शनास आला. त्यानुसार खासगी यु ट्युब चॅनलवर महाराष्ट्र विद्यापीठाच्या, मंडळाच्या व इतर परिक्षांमध्ये होणार्‍या गैरप्रकारास प्रतिबंध करण्याबाबतच्या आधिनियमाच्या विविध कलमान्वये, तसेच माहिती तंत्रज्ञान, भारतीय न्यायसंहितेच्या ७२, २२३ आणि ३(५) नुसार गुन्हा दाखल करण्यात आला आहे.

तक्रारदार शिंदे या राज्य शैक्षणिक संशोधन व प्रशिक्षण परिषद महाराष्ट्र पुणे येथे सहायक संचालक पदावर कार्यरत आहेत. तक्रारीनुसार, राज्य शासनाने २०२१ पासून इयत्ता ३ ते ९ वी पर्यंतच्या विद्यार्थ्यांची क्षैक्षणिक प्रगती होऊन प्रथम भाषा मराठी, गणित व तृतीय भाषा इंग्रजी या विषयांच्या विद्यार्थ्यांसाठी नियतकालिक मुल्यांकन चाचणी सुरू केली आहे. नंतर २०२३ पासून राज्य शैक्षणिक संशोधन व प्रशिक्षण परिषदच्या वतीने राज्यातील सर्व शासकीय तसेच निमशासकीय व अनुदानित शाळांना विद्यार्थ्यांच्या प्रगतीकरिता परिषदेतर्फे पायाभूत चाचणी ६ ऑगस्ट २०२५ ते ८ ऑगस्ट या कालावधीत आयोजीत करण्यात आली होती. त्यानुसार सर्व जिल्ह्यातील शिक्षणाधिकारी, सर्व जिल्हा प्रशासन अधिकारी, सर्व शिक्षण निरीक्षक मुंबई या सर्वाची पत्रव्यवहार करण्यात आला होता.

दिनांक १७ जुलै ते दिनांक ३१ जुलै पर्यंत परिषदेच्या वतीने परिक्षेसाठी लागणारे पेपर खासगी कार्गो कंपनीमार्फत पाठविण्यात आले होते. त्यानंतर ६ ऑगस्टला दुपारी साडेबारा वाजता एका युट्युब चॅनेलवर संबधित जिल्ह्यांना पाठविलेल्या चाचणी पत्रिका त्यापैकी सातवीचे मराठीचे पेपर, ५ ऑगस्टला झालेला व ७ ऑगस्टला होणार्‍या सातवी आठवीचे गणिताचे पेपर प्रसारित झाल्याचे निदर्शनास आले. दरम्यान या यु ट्युबची माहिती घेतलयानंतर चॅनेल हे कैलासन सर मॅथ्स, म मराठी, एस. जे. ट्युशन क्लासेस या तीन यु ट्युब चॅनेलची नावे पुढे आली. या खासगी यु ट्युब चॅनेलने कोणतीही परवागी न घेता अज्ञाताकडून हे पेपर मिळवून या चॅनेलवर प्रश्न व त्यांची उत्तरे प्रसारीत करून शासकीय आदेशाचा भंग केला. त्यानुसार या चॅनेलवर गुन्हा दाखल करण्यात आला आहे. अधिक तपास पोलिस करत आहेत.