गुटखा उद्योगावर पोलिसांचा छापा, कोट्यवधींचा साठा जप्त; 4 जणांना घेतले ताब्यात

स्थानिक पोलिसांनी शहरातील उच्चभ्रू सोसायटीतील एका गोडाऊनवर मोठी कारवाई करत अवैध गुटखा आणि पानमसाला साठ्याचा पर्दाफाश केला आहे.

शिरवळ : स्थानिक पोलिसांनी शहरातील उच्चभ्रू सोसायटीतील एका गोडाऊनवर मोठी कारवाई करत अवैध गुटखा आणि पानमसाला साठ्याचा पर्दाफाश केला आहे. या ठिकाणी गुटखा उत्पादनासाठी अत्याधुनिक यंत्रसामग्री वापरली जात होती. या कारवाईमुळे परिसरात खळबळ माजली असून, नागरिकांमध्ये याची जोरदार चर्चा सुरू आहे.

शिरवळ पोलिसांना मिळालेल्या गोपनीय माहितीनंतर हा छापा टाकण्यात आला. गोडाऊनची तपासणी करताना १ कोटी ६ लाख १९ हजार २७० रुपये किमतीचा मुद्देमाल जप्त करण्यात आला. यामध्ये गुटखा उत्पादनासाठी वापरण्यात येणारी यंत्रसामग्री आणि एक चारचाकी वाहन (किंमत ४.५० लाख रुपये) देखील जप्त करण्यात आले. पोलिसांनी या कारवाईदरम्यान चार व्यक्तींना ताब्यात घेतले आहे.

पोलीस अधीक्षक समीर शेख, अपर पोलीस अधीक्षक डॉ. वैशाली कडुकर, फलटण पोलीस उपविभागीय अधिकारी राहुल धस यांच्या मार्गदर्शनाखाली शिरवळ पोलीस स्टेशनचे पोलीस निरीक्षक यशवंत नलावडे, सहाय्यक पोलीस निरीक्षक महादेव शिद, भगत, पावरा, पोलीस अंमलदार सचिन वीर, तुषार कुंभार, भाऊसाहेब दिघे, अरविंद बाऱ्हाळे, अजित बोराटे, सुरज चव्हाण, तुषार अभंग, दीपक पालेपवाड, आणि अन्न-औषध प्रशासनाच्या अधिकाऱ्यांनी ही कारवाई केली.

तब्बल १५ तास सुरु हाेती झडती

या मोठ्या कारवाईसाठी तब्बल १२ ते १५ तास लागले. रात्री उशिरापर्यंत गुन्हा दाखल करण्याची प्रक्रिया सुरू होती. गुटखा निर्मिती आणि साठवणूक किती दिवसांपासून सुरू होती, याचा तपशील अद्याप समोर आलेला नाही. मात्र, या अवैध धंद्याचा मुख्य सूत्रधारांचा शोध घेण्यासाठी पोलिसांनी तपास वेगाने सुरू केला आहे. महाराष्ट्रात गुटखा विक्रीवर बंदी असतानाही तो मोठ्या प्रमाणावर विक्रीसाठी येत असल्याचे या कारवाईतून स्पष्ट झाले आहे.

पुण्यात मोठी कारवाई

गेल्या काही महिन्याखाली पुणे शहरात कर्नाटक व्हाया सातारामार्गे पुण्यात येणारा तब्बल १ कोटींचा गुटखा पुण्याच्या वेशीवर म्हणजेच खेड शिवापूर टोलनाका परिसरात पुणे ग्रामीण पोलिसांनी पकडला. तब्बल १ कोटी १५ लाख ८८ हजारांचा गुटखा जप्त केला असून, एका टेम्पोतून तो आणला जात होता. राजगड पोलिसांनी ही कारवाई केली असून, याप्रकरणी चालकासह दोघांना अटक केली आहे. गेल्या काही दिवसांपासून पुणे शहरात गुन्हेगारीचे प्रमाण वाढताना दिसत आहे. दरम्यान पोलीस देखील गुन्हेगारी रोखण्यासाठी कठोर पावले उचलताना दिसून येत आहेत.