पूर्णेकर हत्या प्रकरणात नवा ट्विस्ट; सात राऊंड फायरिंगनंतर मारेकऱ्यांपैकी एक जखमी? संतोष कनोजिया उर्फ ‘टल्ली’चा शोध सुरू

सात गोळ्या झाडल्या... चार गोळ्या पूर्णेकरांना लागल्या, तर तीन गोळ्या लक्ष्य चुकल्या. मात्र, याच तीनपैकी एका गोळीने मारेकऱ्यालाच जखमी केले का? प्रदीप पूर्णेकर हत्या प्रकरणाच्या तपासात आता हाच प्रश्न पोलिसांसमोर आहे.

• ‘टल्ली’ची ओळख पटली; संतोष कनोजिया उर्फ टल्लीचा शोध सुरू
• सात राऊंड फायर; चार गोळ्या पूर्णेकरांना लागल्या
• मारेकऱ्यालाच गोळी लागल्याचा पोलिसांना संशय

 

शिवसेना ठाकरे गटाचे नेते प्रदीप पूर्णेकर यांच्या हत्या प्रकरणाने गेल्या काही दिवसांपासून महाराष्ट्राचे लक्ष वेधले आहे. या हत्याकांडाचा तपास सुरू असतानाच आता पोलिसांच्या हाती महत्त्वाची माहिती लागली आहे. हत्याकांडात चर्चेत आलेल्या ‘टल्ली’ची ओळख पोलिसांनी पटवली असून, त्याचे नाव संतोष कनोजिया उर्फ टल्ली असल्याचे समोर आले आहे. दरम्यान, मारेकऱ्यांपैकी एकाला गोळी लागून तो जखमी झाला असावा, असा संशय पोलिसांना आहे. हा जखमी मारेकरी टल्लीच असण्याची शक्यताही तपासात व्यक्त केली जात आहे.

‘टल्ली’ नेमका कोण? पोलिसांकडून शोध सुरू

प्रदीप पूर्णेकर यांच्या हत्येनंतर ‘टल्ली’ हे नाव चर्चेत आले होते. आता पोलिसांनी त्याची ओळख निश्चित केली आहे. संतोष कनोजिया उर्फ टल्ली आणि त्याच्या अन्य एका साथीदाराचा पोलिसांकडून शोध सुरू आहे. पप्या शिंदेच्या आईनेही पूर्णेकर यांच्या हत्येमागे टल्लीचा हात असल्याचा संशय व्यक्त केला होता. त्यामुळे टल्लीची भूमिका या संपूर्ण हत्याकांडात नेमकी काय होती, याचा तपास पोलिसांकडून केला जात आहे.

हेही वाचा: Pune Crime: बिबवेवाडीत धक्कादायक प्रकार; अल्पवयीनाच्या हातातील पिस्तुलातून सुटली गोळी, तरुणाच्या पार्श्वभागात घुसली

सात राऊंड फायर; चार गोळ्या पूर्णेकरांना लागल्या

पोलिसांच्या तपासात हत्येच्या घटनेबाबत आणखी काही महत्त्वाची माहिती समोर आली आहे. मारेकऱ्यांनी पूर्णेकर यांच्या कार्यालयात शिरल्यानंतर रिव्हॉल्व्हरमधून सात राऊंड फायर केल्याचे सांगण्यात येत आहे. यापैकी चार गोळ्या पूर्णेकर यांना लागल्या, तर तीन गोळ्या लक्ष्य चुकवून गेल्या. यातीलच एक गोळी मारेकऱ्यांपैकी एका व्यक्तीला लागली असावी, असा पोलिसांना संशय आहे.

छोट्या कार्यालयात गोळीबार; गोळी रिव्हर्स झाल्याचा संशय

पूर्णेकर यांचे कार्यालय तुलनेने छोटे असल्याने मारेकऱ्यांना जवळून गोळीबार करावा लागला होता. याचवेळी झाडलेल्या गोळ्यांपैकी एखादी गोळी रिव्हर्स होऊन मारेकऱ्यालाच लागली असावी, असा पोलिसांचा प्राथमिक अंदाज आहे. त्यामुळे घटनास्थळावर आढळलेले रक्ताचे नमुने आणि इतर पुरावे या तपासात महत्त्वाचे ठरणार आहेत.

हेही वाचा: Purnekar Update: पूर्णेकर हत्या प्रकरणात अचानक ‘महिला कनेक्शन’; ३ महिला पोलिसांच्या ताब्यात, तपासाला नवा ट्विस्ट

फॉरेन्सिक तपासातून उलगडा होणार?

घटनेनंतर पोलिसांनी तातडीने फॉरेन्सिक पथकाला घटनास्थळी पाचारण केले होते. पथकाने घटनास्थळावरून रक्ताचे नमुने तसेच काडतुसांच्या पुंगळ्या ताब्यात घेतल्या आहेत. या नमुन्यांची तपासणी करण्यात येत असून, गोळीबारासाठी नेमकी कोणती बंदूक वापरण्यात आली, याचाही तपास केला जात आहे.

रक्ताच्या नमुन्यांमुळे तपासाला नवी दिशा?

घटनास्थळावर सापडलेल्या रक्ताच्या नमुन्यांची चाचणी आणि शस्त्रासंदर्भातील फॉरेन्सिक तपासाचा अहवाल महत्त्वाचा ठरणार आहे. रक्ताचा नमुना मारेकऱ्यांपैकी एखाद्याचा असल्याचे स्पष्ट झाल्यास तपासाला नवी दिशा मिळू शकते. त्यामुळे संतोष कनोजिया उर्फ टल्ली याचा या हत्याकांडातील सहभाग आणि तो गोळीबारात जखमी झाला होता का, याचा उलगडा होण्याची शक्यता आहे. फॉरेन्सिक अहवालानंतर या प्रकरणात आणखी कोणते नवे ट्विस्ट समोर येतात, याकडे पोलिसांसह सर्वांचे लक्ष लागले आहे.