खळबळजनक ! मुख्याध्यापकाचा विद्यार्थिनीवर अत्याचार; मुख्याध्यापकासह शिक्षक निलंबित

पीडितेच्या मैत्रिणींनी ही घटना पालकांना सांगितली. पीडित मुलीला अत्याचारामुळे त्रास होत असल्याचे कुटुंबाच्या लक्षात आल्यावर व घटनेची शहानिशा झाल्यानंतर पीडितेच्या आजीने व काही पालकांनी पोलीसांना घडलेला प्रकार सांगितला.

इगतपुरी : तालुक्यातील टाकेद बुद्रुक येथील एका कॉलेजच्या प्राचार्याने शिक्षकी पेशाला काळीमा फासणारी घटना केल्याचे उघडकीस आली आहे. शाळेतील अल्पवयीन मुलीला घरकामाच्या नावाखाली स्वतःच्या घरी बोलावून अत्याचार केल्याची घटना घडली आहे. विशेष म्हणजे या शाळेच्या मुख्याध्यापकानेच इतर शिक्षकाच्या मदतीने 13 वर्षांच्या अल्पवयीन मुलीवर अत्याचार केल्याचे शुक्रवार (दि. ७) रोजी उघडकीस आले आहे.

याबाबत पीडितेच्या कुटुंबियानी घोटी पोलीस ठाण्यात तक्रार दाखल केल्यानंतर पोलीसांनी या घटनेची तात्काळ दखल घेत शुक्रवारी रात्रीच संशयित मुख्याध्यापकासह शिक्षकाला अटक गुन्हा दाखल केला आहे. या घटनेमुळे टाकेद बुद्रुक परिसर आणि संपूर्ण इगतपुरी तालुक्यात ह्या संतापजनक घटनेने खळबळ माजली आहे. या घटनेच्या निषेधार्थ शनिवार (दि. ८) भारत सर्व सेवा संघ संचलित न्यु इंग्लीश स्कूल व ज्युनियर कॉलेज (कला व विज्ञान) टाकेद बुद्रुक गावातील ग्रामस्थांनी शाळेवर एकच गर्दी केली होती.

संबधित आरोपींना पाठीशी घालण्याचा प्रयत्न केल्यास ग्रामस्थांच्यावतीने तीव्र स्वरूपाचे आंदोलन करण्यात येईल, असा इशारा यावेळी ग्रामस्थांनी दिला. तसेच संस्थेची शासन मान्यता रद्द करण्यात यावी, अशी मागणीही ग्रामस्थांनी केली.

घरी कोणी नसताना अत्याचार; संशयित पोलिसांच्या ताब्यात

उपविभागीय पोलीस अधिकारी हरीष खेडकर व पोलीस निरीक्षक विनोद पाटील यांनी जमावाला शांत करून संशयितांवर कठोर कारवाई करण्यात येईल, असे आश्वासन दिले. येथील न्यू इंग्लिश स्कुल शाळेत सहावीत शिकणाऱ्या १२ वर्षांच्या विद्यार्थिनीला शुक्रवारी (दि. ७) दुपारी घरकामाच्या नावाखाली वर्गशिक्षक गोरख जोशी याने तुकाराम साबळेच्या सांगण्यावरून टाकेद बुद्रुक येयील मुख्याध्यापकाच्या घरी नेले. मुख्याध्यापक तुकाराम साबळे याच्या घरातील कुटुंब गावातीलच एका लग्नासाठी साकुर फाटा येथे गेले होते. या संधीचा फायदा घेऊन तुकाराम साबळे याने पीडितेवर अत्याचार केला. यानंतर मुलीला घरी पाठवून दिले. पीडितेने हा प्रकार मैत्रिणींना सांगितला.

शहानिशा करून पोलिसांत तक्रार

पीडितेच्या मैत्रिणींनी ही घटना पालकांना सांगितली. पीडित मुलीला अत्याचारामुळे त्रास होत असल्याचे कुटुंबाच्या लक्षात आल्यावर व घटनेची शहानिशा झाल्यानंतर पीडितेच्या आजीने व काही पालकांनी पोलीसांना घडलेला प्रकार सांगितला. पोलीस निरीक्षक विनोद पाटील यांनी तक्रार दाखल करून तुकाराम साबळे व शिक्षक जोशी याला अटक केली.

टाकेद बुद्रुक येथील घटना निंदनीय

टाकेद बुद्रुक येथे घडलेली घटना निंदनीय असून, या घटनेतील संशयित मुख्याध्यापक आणि शिक्षकाला निलंबित करण्याचे निर्देश दिले आहेत. या प्रकरणाचा लवकरात लवकर तपास करून संबंधितांना बडतर्फ करण्यात येईल.

• दादा भुसे, शिक्षणमंत्री.