Buldhana: हत्याकांडप्रकरणात २० जणांना अटक, देऊळगाव राजात नगरसेवकासह दोघांचा खून; दोन्ही गटांतील ४० जणांवर गुन्हा

Buldhana Deulgaon Raja Crime News देऊळगाव राजात कव्वालीच्या कार्यक्रमातील बसण्याच्या जागेवरून सुरू झालेल्या वादाला हिंसक वळण लागून दोन गटांत हाणामारी झाली, ज्यात दोघांचा उपचारादरम्यान मृत्यू झाला.

• देऊळगाव राजा हत्याकांड
• नगरसेवकासह दोघांचा मृत्यू
• दोन्ही गटांतील २० जणांना अटक

देऊळगाव राजा: शहरातील प्रतापनगर-भोलेशहा दर्त्यांजवळ दोन गटात झालेल्या वादाला हिंसक वळण लागून दोघांचा मृत्यू झाल्याची गंभीर घटना सोमवारी रात्री घडली. या प्रकरणी देऊळगाव राजा पोलिस ठाण्यात परस्परविरोधी खुनाचे दोन गुन्हे दाखल करण्यात आले असून पोलिसांनी आतापर्यंत २० आरोपींना अटक केली आहे. यात दोन्ही गटातील ३६ ते ४० जणांविरुद्ध गुन्हे दाखल करण्यात आले असून ७ जखमींवर उपचार सुरू आहेत. तसेच पसार आरोपींचा शोध घेण्यासाठी पोलिसांची स्वतंत्र पथके रवाना करण्यात आली आहेत. दरम्यान, शहरातील परिस्थिती पूर्णपणे नियंत्रणात असून, पोलिसांकडून कडेकोट बंदोबस्त तैनात करण्यात आला आहे.

कव्वालीच्या कार्यक्रमात बसण्याच्या जागेवरून सुरू झालेल्या वादाचे पर्यावसान दोन गटात हिंसक संघर्षात झाले, लाठ्या, काठ्या आणि तलवारीने हाणामरी झाली. यात शिवसेना शिंद गटाचे नगरसेवक शेख अनवर उर्फ अनु शेख अली (४२, रा. हाकीम कॉलनी, देऊळगाव राजा) आणि राष्ट्रवादी अजित पवार गटाशी संबंधित आसीफ उर्फ आरीफ हारून पठाण (३५, रा. देऊळगाव राजा) गंभीर जखमी झाले. त्यांचा उपचारादरम्यान जालना येथे मृत्यू झाला. घटनेनंतर परिसरात काही काळ तणावाचे वातावरण निर्माण झाले होते. या प्रकरणी शेख अतिक शेख उमर (३३. रा. प्रतापनगर, देऊळगाव राजा) यांनी दिलेल्या तक्रारीनुसार, शेख अकीब शेख पाशु याच्यासह इतर आरोपींनी गैरकायद्याची मंडळी जमवून पूर्वनियोजित कट रचल्याचा आरोप आहे. आरोपींनी चाकू, लाकडी दांडा, कुऱ्हाड आदी हत्यारे हातात घेऊन नातेवाईकांच्या घरात तसेच घराबाहेर हल्ला केल्याचे तक्रारीत म्हटले आहे. या हल्ल्यात तक्रारदाराचे नातेवाईक आसीफ पठाण यांच्यावर चाकू व कुऱ्हाडीने गंभीर वार करण्यात आले. उपचारादरम्यान त्यांचा मृत्यू झाला. तसेच अन्य काही व्यक्तींनाही मारहाण करून गंभीर जखमी करण्यात आल्याचा आरोप आहे. याप्रकरणी देऊळगाव राजा पोलिस ठाण्यात गुन्हा दाखल करण्यात आला आहे.

तरदुसऱ्या गटाकडून शेख मुजाहिद शेख अली (४६, रा. हाकीम कॉलनी, देऊळगाव राजा) यांनी पोलिस ठाण्यात तक्रार दाखल केली, त्यांच्या तक्रारीनुसार, शाहरुख खान अहमद खान याच्यासह इतर आरोपींनी कट रचून तक्रारदार व त्याच्या भावावर हल्ला केल्याचा आरोप आहे. आरोपींनी काठ्या, चाकू व लोखंडी रॉडच्या सहाय्याने मारहाण केल्याचे तक्रारीत नमूद आहे. या हल्ल्यात तक्रारदाराचा भाऊ शेख अनवर उर्फ अनु शेख अली (४२, रा. हाकीम कॉलनी, देऊळगाव राजा) गंभीर जखमी झाले. त्यांचाही मृत्यू झाला. तसेच तक्रारदार व साक्षीदारांना मारहाण करून जीवे मारण्याची धमकी दिल्याचा आरोप तक्रारीत करण्यात आला आहे. या प्रकरणी देऊळगाव राजा पोलिस ठाण्यात गुन्हा दाखल करण्यात आला आहे. या दोन्ही प्रकरणी पुढील तपास पोलिस निरीक्षक ब्रह्मा गिरी आणि सहाय्यक पोलिस निरीक्षक सविता कुवारे देऊळगाव राजा पोलिस ठाणे करीत आहेत.

शहरात पोलिसांचा कडेकोट बंदोबस्त

घटनेची गंभीरता व संवेदनशीलता लक्षात घेऊन पोलिस अधीक्षक नीलेश तांबे यांनी घटनास्थळी भेट देऊन परिस्थितीची पाहणी केली, तसेच आरोपींचा तातडीने शोध घेऊन अटक करणे आणि परिसरात कायदा व सुव्यवस्था अबाधित ठेवण्याच्या सूचना संबंधित पोलिस अधिकाऱ्यांना दिल्या, घटनेनंतर देऊळगाव राजा शहरातील परिस्थिती लक्षात घेऊन पोलिसांनी बंदोबस्त वाढविला आहे. पॉलिस अधीक्षकांच्या मार्गदर्शनाखाली स्थानिक पोलिसांसह दंगल नियंत्रण पथक आणि क्यूआरटी पथक तैनात करण्यात आले आहे.

दोन्ही मृतांवर पोलिस बंदोबस्तात अंत्यसंस्कार

देऊळगाव राजा येथील दोन गटांतील हिंसक संघर्षात मृत्यू झालेल्या आसीफ उर्फ पोलिसांच्या कडेकोट बंदोबस्तात अंत्यसंस्कार करण्यात आले. कोणताही आरीफ हारून पठाण आणि शेख अनवर उर्फ अनु शेख अली यांच्या पार्थिवावर अनुचित प्रकार घडू नये यासाठी स्थानिक पोलिसांसह दंगल नियंत्रण पथक व क्यूआरटी पथक तैनात करण्यात आले होते. शहरातील संवेदनशील भागातही पोलिसांचा चोख बंदोबस्त ठेवण्यात आला.

Buldhana PM Awas Yojana: ८४ हजार घरकुलांचे स्वप्न अधुरे! ३२४ कोटींचे अनुदान रखडले; हक्काच्या घराची प्रतीक्षा कधी संपणार?