लग्न झाले असतानाही दुसऱ्या महिलेशी अनैतिक संबंध; लोखंडी पाईपने मारहाण करून एकाची हत्या

आपटी येथील रहिवासी मृत नागसेनचे एका महिलेशी अनैतिक संबंध होते. याच कारणावरून त्याला कोल्हे गिरीश आणि अविनाश यांनी समज दिली होती. पण भगत याच्या वर्तनात काहीच बदल झाला नाही.

• अनैतिक संबंध ठेवणाऱ्यास दोघांची लोखंडी पाईपने मारहाण
• एसपींकडून घटनास्थळाची पाहणी
• काही तासांतच आरोपींना ठोकल्या बेड्या

पुलगाव : लग्न झाले असतानाही दुसऱ्या महिलेसोबत अनैतिक संबंध ठेवणाऱ्यास दोघांनी लोखंडी पाईपने मारहाण करून खून केला. या घटनेत दोन आरोपींना अटक करण्यात आली. ही घटना बुधवारी सकाळी 8 वाजताच्या सुमारास नजीकच्या आपटी परिसरात घडली.

नागसेन मारोतराव भगत (वय ४५, रा. आपटी) असे मृताचे नाव आहे. तर गिरीश पद्माकर कोल्हे (वय ४८) व अविनाश जनार्दन कोल्हे (वय ४३, रा. दोघेही आपटी) असे अटक केलेल्या आरोपींची नावे आहे. या रक्तरंजित घटनेमुळे परिसरात एकच खळबळ उडाली आहे. आपटी येथील रहिवासी मृत नागसेनचे एका महिलेशी अनैतिक संबंध होते. याच कारणावरून त्याला कोल्हे गिरीश आणि अविनाश यांनी समज दिली होती. पण भगत याच्या वर्तनात काहीच बदल झाला नाही. अशातच बुधवारी सकाळी ८ ते ९ वाजताच्या सुमारा पुलगाव-आपटी मार्गावरील हनुमान मंदिर जवळ गिरीश व अविनाश यांनी नागसेन याच्याशी वाद करून त्याला लोखंडी पाईपने बेदम मारहाण केली.

Cyber Crime : OTP-PIN शेअर करताय? थांबा ! एका क्लिकने खातं होऊ शकतं रिकामं; मुंबई पोलिसांचा नागरिकांना सावधानतेचा इशारा

यात ते गंभीर जखमी झाले. त्यांना परिसरातील नागरिकांच्या मदतीने तातडीने पुलगाव येथील ग्रामीण रुग्णालयात दाखल करण्यात आले. मात्र, प्रकृती गंभीर असल्याने त्यांना सावंगी मेघे येथील रुग्णालयात हलवण्यात आले. तेथे उपचारादरम्यान त्यांचा मृत्यू झाला. याप्रकरणी पुलगाव पोलिसांनी हत्येच्या कलमान्वये गुन्हा दाखल करून गिरीश कोल्हे व अविनाश कोल्हे याला अटक केली आहे. घटनेची माहिती मिळताच पुलगाव पोलिस अॅक्शन मोडवर आले.

एसपींकडून घटनास्थळाची पाहणी

हत्येच्या घटनेची माहिती मिळताच पोलिस अधीक्षक सौरभकुमार अग्रवाल, अपर पोलिस अधीक्षक सदाशिव वाघमारे, उपविभागीय पोलिस अधिकारी डॉ. वंदना कारखेले यांनी घटनास्थळ गाठून घटनास्थळाची बारकाईने पाहणी केली. तर घटनास्थळी पोहोचलेल्या फॉरेन्सिकच्या टीमने घटनास्थळावरून रक्तमिश्रीत माती, साधी माती व इतर नमुने घेत ते विश्लेषणासाठी पाठविले.

अवघ्या काही तासात आरोपीस बेड्या

घटनेची माहिती मिळताच पुलगाव पोलिस अॅक्शन मोडवर आले. पोलिसांनी संबंधित प्रकरणातील आरोपींचा घटनेनंतर अवघ्या काही तासांत शोध घेत त्यांना ताब्यात घेत अटक केली. ही कामगिरी सहाय्यक पोलिस निरीक्षक नितीन मदनकर, विनोद राघाटाटे, संदीप बोरबन, सोमित गनथाडे, अजय अनंतवार, अमोल बरडे यांनी कारवाई केली.