Pune Crime News: भीक मागण्यासाठी पुण्यातून दोन वर्षांच्या चिमुरडीचे अपहरण; तुळजापूर येथून टोळीला अटक

पुण्यातील कात्रज परिसरातून दोन वर्षाच्या चिमुरडीचा अपहरण करून तिला भीक मागायला लावणार असल्याचे धक्कदायक माहिती समोर आली आहे. भारती विद्यापीठ पोलिसांनी या टोळीचा पर्दाफाश केला आहे.

पुण्यातून एक संतापजनक प्रकार समोर आला आहे. पुण्यातील कात्रज परिसरातून दोन वर्षाच्या चिमुरडीचा अपहरण करून तिला भीक मागायला लावणार असल्याचे धक्कदायक माहिती समोर आली आहे. भारती विद्यापीठ पोलिसांनी या टोळीचा पर्दाफाश केला आहे. पोलिसांनी धाराशिव जिल्ह्यातील तुळजापूर येथून चिमुरडीची सुखरूप सुटका करत टोळीतील पाच जणांना अटक केली आहे. यात एका महिलेचाही समावेश आहे.

धक्कादायक ! घरात घुसून तरुणीच्या अपहरणाचा प्रयत्न; कुटुंबियांनी विरोध करताच मारहाण, पण शेजारी धावून आले अन्…

नेमकं काय घडलं?

फिर्यादी धनसिंग हनुमंत काळे (वय २५) हे आपल्या कुटुंबासह कात्रजमधील वंडर सिटी परिसरातील झोपडी वजा घरात वास्तव्यास आहेत. त्यांना चार अपत्य असून त्यातील दोन वर्षाच्या जुळ्या मुली आहेत. २५ जुलै रोजी रात्रीच्या सुमारास संपूर्ण कुटुंब झोपेत असतांना, चिमुरडीला झोपाळ्यातून उचलून नेण्यात आले. मध्यरात्री जाग आल्यावर ही बाब लक्षात येताच त्यांनी तातडीने भारती विद्यापीठ पोलीस ठाण्यात तक्रार दाखल केली.

घटनेची गंभीरता पाहून पोलीस आयुक्त अमितेश कुमार यांनी दखल घेत पीडित मुलीचा तातडीने शोध घेण्याच्या सूचना दिल्या. वरिष्ठ पोलीस निरीक्षक राहुल खिलारे यांच्या मार्गदर्शनाखाली दोन तपास पथके तयार करण्यात आली. याशिवाय गुन्हे शाखेने स्वतंत्र तपासपथक कार्यरत केले. तपासात वंडर सिटी परिसरात असलेल्या सीसीटीव्ही फुटेज पाहण्यात आले. त्यात तीन जण एका दुचाकीवर मुलीसह जातांना दिसून आले. पोलिसांनी कात्रज ते पुणे रेल्वे स्थानक परिसरातील १४० सीसीटीव्ही फुटेज तपासले. रेल्वे स्थानकावरील फुटेजमध्ये आणखी दोघे आरोपी दिसून आले.

तुळजापूर येथून चिमुरडीचा सुटका

पोलिसांची चौकशी आणि फुटेजच्या आधारे तपास पथक तुळजापूर येथे रवाना झाले. स्थानिक पोलिसांच्या सहकार्याने सुरुवातीला तीन आरोपींना ताब्यात घेतले. आणि त्यांच्या ताब्यातून २ वर्षाची चिमुरडीला रेस्क्यू करण्यात आलं. पुढील चौकशीत उर्वरित दोन आरोपींनाही अटक करण्यात आली. आरोपींनी भीक मागण्यासाठीच चिमुरडीचे अपहरण केल्याची कबुली दिली.

न्यायालयात हजर

अटक करण्यात आलेल्या आरोपींची नावे सुनील सिताराम भोसले (वय ५१),शंकर उजण्या पवार (वय ५०),शालुबाई प्रकाश काळे (वय ४५),गणेश बाबू पवार (वय ३५),मंगल हरफुल काळे (वय १९), हे सर्वजण मोतीझारा (ता. तुळजापूर, जि. धाराशिव) अशी आहेत. पोलिसांनी या पाचही आरोपींना पुण्यातील न्यायालयात हजर केले आहे. न्यायालयाने त्यांना २ ऑगस्ट पर्यंत पोलीस कोठडी सुनावली आहे.

शाळेतील शिक्षिकेचा विद्यार्थ्याशी अश्लील प्रकार; इंस्टाग्रामवर करायची अर्धनग्न व्हिडीओ कॉल….