डोक्याला विग अन् पुणे शहरात घरफोड्या; पोलिसांनी गुजरातच्या आरोपीसह चौघांना पकडले

पुणे शहरात घरफोड्यांच्या घटना घडत असताना विश्रामबाग पोलिसांनी डोक्यावर विग लावून घरफोड्या करणाऱ्या आंतरराज्यीय टोळीचा पर्दाफाश केला आहे. गेल्या सहा महिन्यांपासून पोलिसांना गुंगारा देणारा सराईत शंकरसिंग जुनी याच्यासह चौघांना अटक केली आहे.

पुणे : पुणे शहरात घरफोड्यांच्या घटना घडत असताना विश्रामबाग पोलिसांनी डोक्यावर विग लावून घरफोड्या करणाऱ्या आंतरराज्यीय टोळीचा पर्दाफाश केला आहे. गेल्या सहा महिन्यांपासून पोलिसांना गुंगारा देणारा सराईत शंकरसिंग जुनी याच्यासह चौघांना अटक केली आहे. त्यांच्याकडून ३७ लाख रुपये किमतीचे सोन्या-चांदीचे दागिने हस्तगत करण्यात आले असून, विश्रामबाग, विश्रांतवाडी, काळेपडळ आणि दत्तवाडी परिसरातील नऊ घरफोड्यांचे गुन्हे उघडकीस आले आहेत.

शंकरसिंग उर्फ कुणालसिंग जितेंद्रसिंग जुनी (वय.२७, रा. रामटेकडी हडपसर), रणबीरसिंग धनसिंग बावरी शिकलीगर (वय.२६, रा. बडोदा, गुजरात), अक्षयसिंग उर्फ अक्षय बिरुसिंग जुनी (वय.२२, रा.बिराजदार नगर हडपसर) आणि सोनुसिंग शाखासिंग शिकलीगर ऊर्फ तीलपिटीया (वय.२२, रा. बडोदा, गुजरात) अशी अटक करण्यात आलेल्यांची नावे आहेत.

शंकरसिंग उर्फ कुणालसिंग जितेंद्रसिंग जुनी हा सराईत गुन्हेगार असून, तो मुख्य आरोपी आहे. घरफोडी करताना ओळख पटू नये, यासाठी तो डोक्यावर बनावट केसांचा टोप (वीग) आणि तोंडावर मास्क लावत होता. त्याच्या वेशातील व्हिडीओ सोशल मिडीयावर व्हायरल झाला होता.

तो गेल्या सहा महिन्यांपासून पोलिसांना हुलकावणी देत होता. दरम्यान, विश्रामबाग पोलिस तपास करत असताना माहिती मिळाली की, घरफोडीच्या गुन्ह्यातील काही संशयित आरोपी उंड्री पिसोळीत आहेत. त्यानूसार, पथकाने या भागात सापळा रचला. त्यावेळी आरोपी कारने उंड्री पिसोळी येथील डोंगराच्या रोडने येत असल्याची माहती मिळाली. त्यानुसार पथकाने सापळा रचून चौघांना ताब्यात घेतले. चौकशीत त्यांनी गुन्ह्याची कबुली दिली. आरोपींनी चोरी केलेले सोन्याचे दागिणे गुजरात येथील साथीदारांकडे ठेवले होते.

ही कामगिरी पोलिस उपायुक्त रुषीकेश रावले, सहायक पोलिस आयुक्त अनुजा देशमाने यांच्या मार्गदर्शनाखाली वरिष्ठ निरीक्षक नवनाथ जगताप, गुन्हे निरीक्षक विकास भिंगारदिवे, रमेश लाहिगुडे, सहायक पोलिस निरीक्षक उमेश कारके, उपनिरीक्षक मेहबुब मोकाशी, कर्मचारी अनिस शेख, कैलास डुकरे, सचिन अहिवळे, शैलेश सुर्वे, महेश कदम यांच्या पथकाने केली.

पोलिसांना गुंगारा देण्यासाठी नामी शक्कल

आरोपी सराईत गुन्हेगार आहेत. घरफोडी करताना पोलिस आपल्याला पेहरावावरून ओळखतील याची माहिती त्यांना होती. त्यामुळे त्यांनी डोक्याला केसांचा विग लावला. तसेच तोंडाला मास्क लावले. सुरुवातीला पोलिस देखाल त्यांना ओळखण्यात फसले होते. पण, अचूक माहितीनंतर आरोपीला पकडण्यात यश आले.

हे सुद्धा वाचा  : पुण्यात खळबळ! भाचा गेला, सून माहेरी निघून गेली… मामाच्या मनात पेटला संताप, पुढे घडलं धक्कादायक

नाकाबंदीमुळे पळ काढण्यास घाबरले

अटक चोरट्यामध्ये दोघेण गुजरात येथील आहेत. तर दोघे पुण्यातील. घरफोडी केल्यानंतर चोरी केलेला मुद्देमाल दोघे आरोपी गुजरातला घेऊन जात होते. त्यामुळे अनेक घरफोड्या केल्यानंतर देखील ते पोलिसांच्या रडारवर आले नव्हते. विश्रामबाग पोलिस ठाण्याच्या हद्दीत पहाटेच्यावेळी घरफोडी केल्यानंतर ते गुजरातला पळून जाण्याच्या तयारीत होते. मात्र शहरात ठिक-ठिकाणी नाकाबंदी असल्याची माहिती त्यांना होती. त्यामुळे त्यांनी पळून जाण्याचे नियोजन बदलले अन् पोलिसांच्या जाळ्यात अडकले.