Fake Ration Card Case: धक्कादायक! सीएम, डीसीएमचे शहरात बनले रेशनकार्ड (Photo Credit- X)
माजी खासदार इम्तियाज जलील यांनी १२ मार्च रोजी शहरातील अलंकार हॉटेल येथे पत्रकार परिषद घेऊन हे पिवळे रेशनकार्ड दाखवले. या कार्डावर उपमुख्यमंत्री एकनाथ शिंदे यांचे नाव एकनाथ संभाजी शिंदे, (रा. आंबेडकरनगर, औरंगाबाद) असे नमूद करण्यात आले होते. तसेच त्यांच्या कुटुंबातील सदस्यांची नावेही त्यात लिहिलेली असल्याचे दिसून आले. तसेच काडांवर कार्यालयाचे गोल शिक्के आणि सक्षम अधिकाऱ्याची स्वाक्षरी असल्याचे दर्शविण्यात आले होते. त्यामुळे या प्रकरणाची गंभीर दखल घेत प्रशासनाने तात्काळ पडताळणी सुरू केली.
अन्नधान्य वितरण विभागाने रेशनकार्डावर नमूद केलेल्या आधार क्रमांकाच्या आधारे ऑनलाईन प्रणालीमध्ये तपासणी केली. मात्र त्या तपासात असे कोणतेही रेशनकार्ड शासनाच्या नोंदीत नसल्याचे स्पष्ट झाले. याशिवाय आंबेडकर नगर परिसरातील
संबंधित ड रजिस्टर (दप्तर) तपासले असता देखील या कार्डची कोणतीही नोंद आढळून आली नाही. त्यामुळे सदर कार्ड पूर्णपणे बनावट असल्याचे स्पष्ट झाले. त्यामुळे शहरातून कोणाचे ही रेशनकार्ड काढता येते असे दिसून आले.
शासकीय योजनांचा लाभ मिळविण्याच्या उद्देशाने अज्ञात व्यक्तीने हे बनावट रेशनकार्ड तयार केल्याचा प्राथमिक अंदाज प्रशासनाने व्यक्त केला आहे. या प्रकरणी अन्नधान्य वितरण अधिकारी भारती भास्करराव वाकोडे (४०) यांनी दिलेल्या तक्रारीवरून सिटी चौक पोलिस ठाण्यात अज्ञात व्यक्तीविरोधात गुन्हा दाखल करण्यात आला आहे. पुढील तपास निरीक्षक श्रीनिवास रोयलावार करत आहेत.
राज्य शासनाने मागील दोन वर्षांपासून हस्तलिखित शिधापत्रिका देण्याची पद्धत बंद केली आहे. सध्या सर्व रेशनकार्ड केवळ ऑनलाईन प्रणालीद्वारे संगणकावरून प्रिंट करून दिली जातात. मात्र या प्रकरणातील कार्ड पूर्णपणे हाताने लिहिलेले असून त्यावर बनावट शिक्के व स्वाक्षऱ्या असल्याचे तपासात समोर आले. त्यामुळे प्रशासकीय चौकशीत हा बनावटपणा उघड झाला.
.png "Videos"){kind=small}
