Baba Siddique Murder Case : ‘मला शोधू नका’ म्हणत शुभम पसार; लोणकर बंधूबाबत मोठी माहिती समोर

मुंबईत राष्ट्रवादी काँग्रेसचे नेते (अजित पवार गट) बाबा सिद्धीकींच्या हत्येप्रकरणात मुंबई पोलिसांनी पुण्यातील वारजे भागातून प्रवीण लोणकर या तरुणाला अटक केली. प्रवीणचा भाऊ शुभम लोणकर याचाही पोलीस शोध घेत आहेत.

पुणे : मुंबईत राष्ट्रवादी काँग्रेसचे नेते (अजित पवार गट) बाबा सिद्धीकींच्या हत्येप्रकरणात मुंबई पोलिसांनी पुण्यातील वारजे भागातून प्रवीण लोणकर या तरुणाला अटक केली. प्रवीणचा भाऊ शुभम लोणकर याचाही पोलीस शोध घेत आहेत. लोणकर बंधूंचे वास्तव्य गेल्या काही वर्षांपासून वारजेत असल्याचे समोर आले असून, शुभम लोणकर हा बिष्णोई गँगशी संबंध ठेवून असल्याचे सांगितले जात आहे. दरम्यान, ‘मला शोधू नका’ असे म्हणत शुभम पुण्यातून पसार झाल्याची माहिती समोर आली आहे.

बाबा सिद्दिकी यांच्या हत्येपुर्वी शुभम लोणकरने सोशल मिडीयावर पोस्ट केली होती. बिश्नोई गँगने सिद्दिकी यांच्या हत्येची जबाबदारी स्विकारल्याचे नमूद केले होते. नंतर मुंबई पोलिसांनी शुभमचा शोध सुरू केला. याप्रकरणात पोलिसांनी शुभमचा भाऊ प्रवीणला अटक केली. यासर्व घडामोडीनंतर बिश्नोई गँगच्या पुणे कनेक्शनच्या पार्श्वभूमीवर पुणे पोलीसही सतर्क झाले आहेत.

लोणकर भावांची माहिती घेतली. शुभम आणि प्रवीण लोणकर मूळचे अकोला जिल्ह्यातील अकोट तालुक्यातील आहेत. ते दोघे २०११ मध्ये पुण्यात स्थायिक झाले. तर, त्यांचे आई-वडीलही २०१९ मध्ये पुण्यात आले. कर्वेनगर परिसरातील भालेकर वस्तीत लोणकर कुटुंबीय राहत होते. २०२२ मध्ये त्यांनी लोणकर डेअरी व्यवसाय सुरू केला होता, अशी माहिती वरिष्ठ पोलीस अधिकाऱ्यांनी दिली.

भंगार व्यावसायिकांकडे आरोपींची भेट

बाबा सिद्दिकी हत्या प्रकरणातील फरार आरोपी शिवकुमार गौतम, शुभम लोणकर, धर्मराज कश्यप यांना प्रवीण लोणकरने वारजे येथील एका भंगार व्यावसायिकाकडे कामाला लावले होते. तेथे त्यांची ओळख झाल्याची माहिती पुढे आली आहे.

‘एनसीसी’चा विद्यार्थी, भगतसिंहांच्या विचाराने प्रेरित

शुभम लोणकर हा शालेय शिक्षण घेताना ‘एनसीसी’चा विद्यार्थी होता. त्याच्यावर भगतसिंहाच्या विचारांचा पगडा होता. त्यातूनच त्याचे विचार जहाल झाले.

राजस्थानात झाला भरती कॅम्प

लॉरेन्स बिश्नोई गँगमध्ये अलीकच्या काळात तरूणांना भरती करून घेण्यात आल्याचीही माहिती पोलीस यंत्रणेच्या तपासात समोर आली आहे. त्यासाठी राजस्थान येथे भरती कॅम्प झाला. या कॅम्पमध्ये शुभम लोणकर सहभागी झाला होता. तेथूनच त्याचा बिश्नोई गँगशी संबंध आला आहे, अशी माहिती वरिष्ठ अधिकाऱ्याने दिली.