रविवार, 23 ऑगस्ट 2026
संग्रहित फोटो
नांदेड : आईच्या नावावर असलेली वडिलोपार्जित शेतजमीन स्वतःच्या नावावर करण्यासाठी १२ हजार रुपयांची लाच मागणाऱ्या तलाठ्याविरुद्ध लाचलुचपत प्रतिबंधक विभागाने कारवाई केली आहे. मात्र, कारवाईच्या वेळी तलाठी कार्यालयात अनुपस्थित राहिल्याने लाचेची रक्कम स्वीकारली गेली नाही. याप्रकरणी कंधार पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू आहे.
पालसाहेब आनंदराव मुंडे असे संबंधित तलाठ्याचे नाव असून, त्यांची (नंदनवन सज्जा, ता. कंधार) येथे तलाठी म्हणून नियुक्ती आहे. एका ३० वर्षीय तक्रारदाराच्या आईच्या नावावर मौजे नंदनवन येथील गट क्रमांक ३३६ मध्ये ०.५५ आर शेतजमीन आहे. सदर जमीन तक्रारदाराच्या नावावर करण्यासाठी तो तलाठी मुंडे यांना भेटला होता. त्यावेळी मुंडे यांनी काम करून देण्यासाठी १२ हजार रुपयांची लाच मागितल्याची तक्रार ४ ऑगस्ट रोजी लाचलुचपत प्रतिबंधक विभागाकडे करण्यात आली. तक्रारीच्या अनुषंगाने ५ ऑगस्ट रोजी दुपारी कंधार येथील तलाठी कार्यालयात लाच मागणीची पडताळणी करण्यात आली. त्यावेळी तलाठी मुंडे यांनी १२ हजार रुपये लाचेची मागणी करून ती स्वतः स्वीकारण्याची तयारी दर्शविल्याचे निष्पन्न झाले. त्यानंतर १४ ऑगस्ट रोजी तक्रारदाराने तलाठी कार्यालयात मुंडे यांची भेट घेण्याचा प्रयत्न केला. मात्र, ते कार्यालयात उपस्थित नव्हते. तक्रारदाराने त्यांच्या मोबाईलवर संपर्क साधण्याचा प्रयत्न केला असता फोन बंद असल्याचे आढळले. पुन्हा १७ ऑगस्ट रोजी भेटीचे ठिकाण निश्चित करण्यासाठी संपर्क साधला असता त्यांचा मोबाईल बंदच होता. संशय आल्याने मुंडे यांनी लाचेची रक्कम स्वीकारली नसल्याचे एसीबीच्या अहवालात नमूद आहे.
कंधार पोलिस ठाण्यात गुन्हा दाखल
या प्रकरणी कंधार पोलीस ठाण्यात भ्रष्टाचार प्रतिबंधक कायदा १९८८ मधील कलम ७ अन्वये गुन्हा दाखल करण्याची प्रक्रिया सुरू आहे. आरोपीला अद्याप ताब्यात घेण्यात आलेले नाही. ही कारवाई पोलीस निरीक्षक अर्चना करपूडे यांच्या पथकाने केली आहे. पर्यवेक्षण अधिकारी म्हणून पोलीस उपअधीक्षक राहुल तरकसे यांनी काम पाहिले. पोलीस अधीक्षक श्रीकृष्ण कोकाटे, अपर पोलीस अधीक्षक डॉ. अश्विनी जगताप आणि राहुल तरकसे यांच्या मार्गदर्शनाखाली कारवाई करण्यात आली.
