संग्रहित फोटो
पोलिसांनी दिलेल्या माहितीनुसार, गोविंद कागदे याचा सहा महिन्यांपूर्वी वाशी तालुक्यातील तांदूळवाडी येथील बाळासाहेब चौधरी यांची मुलगी अंजली हिच्याशी विवाह झाला होता. मात्र, विवाहापूर्वीपासूनच अंजलीचे तिच्या आत्याचा मुलगा शुभम सुभाष खोसे (वय २६, रा. चांदवड, ता. भूम) याच्याशी प्रेमसंबंध होते. दोघांचीही विवाह करण्याची इच्छा होती. मात्र, अंजलीच्या वडिलांनी तिचा विवाह गोविंद याच्याशी लावून दिला होता. विवाहानंतरही अंजली आणि शुभम यांचे प्रेमसंबंध सुरूच होते. गोविंद हा त्यांच्या संबंधांत अडथळा ठरत असल्याने दोघांनी त्याचा खून करण्याचे ठरवले. त्यानुसार १९ नोव्हेंबर रोजी दुपारी साडेबारा वाजण्याच्या सुमारास दोघांनी गोविंदला फोन करून कुंथलगिरी घाटाजवळील रामकुंड परिसरातील वाकवड तलावाजवळील डोंगराळ भागात बोलावून घेतले. तेथे गोविंदला दारू पाजल्यानंतर त्यांच्यात चर्चा सुरू झाली. यावेळी झालेल्या वादातून दोघांनी गोविंदच्या गळ्याजवळ आणि छातीवर चाकूने वार केले. त्यानंतर दगडाने ठेचून त्याचा खून केला.
दरम्यान, गोविंदच्या आरडाओरड्याचा आवाज जवळच दरीत जनावरे चारत असलेल्या एका गुराख्याने ऐकला. त्याने दोघेजण एका व्यक्तीला मारहाण करत असल्याचे पाहिले. त्यानंतर गुराख्याने वाकवड येथील मारकड नावाच्या व्यक्तीला फोन करून घटनेची माहिती दिली. मारकड यांनी तत्काळ वाशी पोलिसांना याबाबत कळवले. माहिती मिळताच वाशी पोलीस ठाण्याचे पोलीस निरीक्षक शंकर शिंदे हे कर्मचाऱ्यांसह घटनास्थळी दाखल झाले. त्यावेळी शुभम खोसे आणि अंजली कागदे हे हे जंगलाच्या दिशेने पळून जात असल्याचे पोलिसांच्या निदर्शनास आले. पोलिसांनी पाठलाग करून दोघांनाही घटनेच्या अवघ्या अर्ध्या तासात ताब्यात घेतले. घटनास्थळाचा पंचनामा करण्याचे काम सुरू असून, फॉरेन्सिक पथकालाही पाचारण करण्यात आले आहे.
पोलीस निरीक्षक शंकर शिंदे, सहाय्यक पोलीस निरीक्षक एस. व्ही. झराड, पोलीस हवालदार कपिल बोरकर, बाळासाहेब औताडे, विठ्ठल मलंगनेर, नासेर सय्यद, पप्पू पवार यांच्यासह पोलीस कर्मचारी पुढील तपास करीत आहेत. रात्री उशिरापर्यंत गुन्हा नोंदविण्याची प्रक्रिया सुरू होती. रामकुंड परिसरातील वाकवड तलावाजवळ खुनाची घटना घडल्यानंतर गुराख्याने दिलेल्या माहितीवरून वाशी पोलिसांनी तातडीने घटनास्थळी धाव घेतली. यावेळी जंगलाच्या दिशेने पळून जाणाऱ्या पत्नी अंजली आणि शुभम खोसे यांचा पोलिसांनी पाठलाग केला. घटनेच्या अवघ्या अर्ध्या तासात दोघांनाही ताब्यात घेण्यात पोलिसांना यश आले.






