महिलेवर चाकूने वार करुन अत्याचार; न्यायालयाने नराधमाला सुनावली ‘ही’ मोठी शिक्षा

महिलेच्या गळ्यावर चाकूने वार करून जखमी अवस्थेत तिच्यावर अत्याचार करणाऱ्या नराधमाला न्यायालयाने जन्मठेपेसह ३० हजार रुपये दंडाची शिक्षा सुनावली आहे. सत्र न्यायाधीश डी. पी. रागीट यांनी हा निकाल दिला आहे.

पुणे : महिलेच्या गळ्यावर चाकूने वार करून जखमी अवस्थेत तिच्यावर अत्याचार करणाऱ्या नराधमाला न्यायालयाने जन्मठेपेसह ३० हजार रुपये दंडाची शिक्षा सुनावली आहे. सत्र न्यायाधीश डी. पी. रागीट यांनी हा निकाल दिला आहे. या घटनेत महिलेचा मृत्यू झाला. फेब्रुवारी २०१५ मध्ये घडलेल्या या घटनेत आरोपीने अत्याचार केल्यानंतर तिच्या अंगावरील सोने लुटून पळ काढला होता. राजेश मनीराम यादव (रा. वाकडेवाडी, मुळ रा. उत्तर प्रदेश) असे शिक्षा झालेल्याचे नाव आहे. ही घटना शिवाजीनगर येथील अनुतेज अथर्व सोसायटीत घडली होती. याप्रकरणी महिलेच्या मुलाने शिवाजीनगर पोलिसांत तक्रार दिली होती.

महिला घरात एकटीच राहत होती. त्याचा फायदा घेऊन यादवने तिच्याशी ओळख वाढविली. घटनेच्या दिवशी महिलेला मदत करण्याच्या बहाण्याने तो घरात आला. मालिश करण्यास सुरवात केली. यावेळी, त्याने महिलेवर अतिप्रसंग करण्याचा प्रयत्न केला. त्यास महिलेने विरोध केला असता त्याने रागाच्या भरात तिचे तोंड दाबले. नंतर भाजी कापायच्या सुरीने तिच्या गळ्यावर वार केले. हल्ल्यात महिला गंभीर जखमी झाली असताना त्याने तिच्यावर अत्याचार केला. यादरम्यान, महिलेचा मृत्यू झाला. अत्याचारानंतर पळून जाताना त्याने महिलेच्या कानातील सोन्याचे टॉप्स, पायातील चांदीचे पैंजण, मोबाईल तसेच ३ हजार रोख चोरली. महिलेच्या घराचे दार उघडे असल्याने शेजारचे तिच्या घरात आले. तेव्हा त्यांना महिला रक्ताच्या थारोळ्यात पडल्याचे दिसून आले.

पोलिसांनी तपास करून आरोपीला अटक केली. तपास पुर्ण करून न्यायालयात दोषारोपपत्र दाखल केले. या खटल्याचे कामकाज सरकार पक्षातर्फे अ‍ॅड. लीना पाठक यांनी पाहिले. त्यांनी १६ साक्षीदार तपासले. युक्तिवादादरम्यान वैद्यकीय अहवाल, आरोपीच्या बोटांचे ठसे हा पुरावा महत्त्वाचा ठरला. आरोपीने केलेला गुन्हा गंभीर स्वरूपाचा असून त्याला जास्तीत जास्त शिक्षा देण्याचा युक्तिवाद अ‍ॅड. पाठक यांनी केली. न्यायालयाने तो मान्य करत आरोपीला जन्मठेपेसह ३० हजार रुपये दंडाची शिक्षा सुनावली. दंडाची रक्कम न भरल्यास अतिरिक्त सहा महिन्यांचा साधा कारावास भोगावा लागेल, असेही न्यायालयाने आदेशात नमूद केले आहे.

हे सुद्धा वाचा : भरदुपारी अल्पवयीन मुलाचा हात मनगटापासून कापला! रक्तरंजित हल्ल्याने परिसरात तणाव