पलूसमध्ये शिक्षण संस्थेच्या संचालकाचा निर्घृण खून; अपार्टमेंटच्या पार्किंगमध्ये रक्ताच्या थारोळ्यात आढळला मृतदेह
मिळालेल्या माहितीनुसार, मारुती मंदिराजवळ परांजपे यांचा जुना वाडा असून त्यालगतच ‘गजानन सदन’ हे त्यांचे नवीन अपार्टमेंट आहे. गुरुवारी सायंकाळी सुमारे ५.३० वाजता ते श्री धोंडीराज महाराज मंदिरात दर्शनासाठी जातो असे सांगून घराबाहेर पडले. दर्शन करून परतल्यानंतर त्यांनी अपार्टमेंटमधील पार्किंगमध्ये मोटारसायकल उभी केली. त्यानंतर काही वेळातच अज्ञातांनी त्यांच्यावर हल्ला केल्याचा अंदाज व्यक्त केला जात आहे.
दरम्यान, ते बराच वेळ घरी न परतल्याने कुटुंबीयांनी संपर्क साधण्याचा प्रयत्न केला. फोन वाजत असतानाही प्रतिसाद मिळत नसल्याने मुलगा मंदार परांजपे पार्किंगकडे गेला असता त्याला रक्ताचा सडा दिसला. पुढे जाऊन पाहिले असता संजय परांजपे हे गंभीर जखमी अवस्थेत पार्किंगमधील कोपऱ्यातील जागेत पडलेले आढळले.
मंदार यांनी आरडाओरडा करताच शेजारी व अपार्टमेंटमधील रहिवासी घटनास्थळी जमा झाले. त्यांनी तात्काळ पलूस पोलिसांना माहिती दिली. पोलिसांनी तत्काळ घटनास्थळी धाव घेत पंचनामा केला. रक्ताच्या थारोळ्यात पडलेला मृतदेह रुग्णवाहिकेद्वारे ग्रामीण रुग्णालयात शवविच्छेदनासाठी पाठविण्यात आला.
संजय परांजपे हे पं. विष्णू दिगंबर पलूसकर शिक्षण संस्थेचे अध्यक्ष उदय परांजपे यांचे धाकटे बंधू होते. शांत, मितभाषी आणि संयमी स्वभावासाठी ओळख असलेल्या परांजपे यांच्या हत्येमुळे परिसरात तीव्र संताप व्यक्त होत आहे. घटनास्थळी नागरिकांची मोठी गर्दी झाली होती, तर पोलिसांनी कडेकोट बंदोबस्त ठेवला होता. दरम्यान, हा खून नेमका कोणी आणि कोणत्या कारणातून केला, याबाबत अद्याप स्पष्टता नसून पोलिसांकडून विविध अंगांनी तपास सुरू आहे. रात्री उशिरापर्यंत गुन्हा नोंद करण्याची प्रक्रिया सुरू होती.
.png "Videos"){kind=small}
