23 ऑक्टोबरला आईशी शेवटचे बोलणे, 28 ऑक्टोबरला मृतदेह आढळला; मुग्धा देशमुख प्रकरणाने खळबळ

लंडनमध्ये उच्च शिक्षण घेत असल्याचे कुटुंबीयांना वाटत असताना ३४ वर्षीय मुग्धा देशमुख यांचा पुण्यातील गहुंजे परिसरातील उच्चभ्रू असणाऱ्या लोढा बेलमोंडो सोसायटीतील बंद फ्लॅटमध्ये मृतदेह आढळून आला आहे.

• मुग्धा देशमुख यांचा मृतदेह आढळला.
• ब्रिटनमधून भारतात परतल्या होत्या.
• ३ ऑक्टोबरला आईशी शेवटचे बोलणे झाले

पिंपरी : लंडनमध्ये उच्च शिक्षण घेत असल्याचे कुटुंबीयांना वाटत असताना ३४ वर्षीय मुग्धा देशमुख यांचा पुण्यातील गहुंजे परिसरातील उच्चभ्रू असणाऱ्या लोढा बेलमोंडो सोसायटीतील बंद फ्लॅटमध्ये मृतदेह आढळून आला आहे. बुधवारी (२८ ऑक्टोबर) रात्री ही घटना उघडकीस आली आहे. मुग्धा यांचा मृत्यू नेमका कोणत्या परिस्थितीत झाला, याबाबत प्रश्न उपस्थित होत असून, त्या ऑगस्ट २०२६ च्या अखेरीसच ब्रिटनमधून भारतात परतल्याची माहिती इमिग्रेशन नोंदींमधून समोर आल्याचे वृत्त आहे.

 

मुग्धा या छत्रपती संभाजीनगर महापालिकेचे निवृत्त मुख्य अभियंता अविनाश देशमुख यांच्या कन्या होत्या. पतीच्या निधनानंतर त्यांनी जुलै २०२५ मध्ये एमबीएचे शिक्षण घेण्यासाठी लंडन गाठले होते. तेथे त्या स्वतंत्रपणे राहत होत्या. अर्धवेळ नोकरी करत असतानाच त्या आई-वडिलांशी व्हिडिओ कॉल आणि संदेशांद्वारे नियमित संपर्कात होत्या.

ऑनलाइन फूड डिलिव्हरीच्या व्यवहारांमुळे ठावठिकाणा समजला

मुग्धा यांच्याशी संपर्क होत नसल्याने कुटुंबीय चिंतेत होते. छत्रपती संभाजीनगर येथील पोलिसांनी ऑनलाइन खाद्यपदार्थ वितरणाच्या व्यवहारांच्या आधारे त्यांचा ठावठिकाणा शोधला. त्यानंतर पोलिसांचे पथक गहुंजे येथील लोढा बेलमोंडो सोसायटीतील त्यांच्या फ्लॅटवर पोहोचले. फ्लॅटचा दरवाजा आतून बंद होता. घरातून दुर्गंधी येत असल्याने पोलिसांनी दरवाजा तोडून आत प्रवेश केला. त्यावेळी बेडरूममध्ये मुग्धा यांचा कुजलेल्या अवस्थेतील मृतदेह आढळला.

२३ ऑक्टोबरला आईशी झाले होते शेवटचे बोलणे

मिळालेल्या माहितीनुसार, २३ ऑक्टोबर रोजी मुग्धा यांनी आईशी फोनवर संवाद साधला होता. नोकरीच्या मुलाखतीसाठी घाईत असल्याचे त्यांनी आईला सांगितले होते. हा संवाद कुटुंबीयांसोबतचा त्यांचा शेवटचा संपर्क ठरला. त्यानंतर दुसऱ्या दिवशी संध्याकाळी आई-वडिलांनी त्यांच्याशी संपर्क साधण्याचा प्रयत्न केला असता, त्यांचा मोबाइल बंद असल्याचे आढळले.

हे सुद्धा वाचा : आधी तरुणी बनून मैत्री, नंतर पोलिस बनून ब्लॅकमेलिंग; पुण्यातील आत्महत्या प्रकरणाचा उलगडा

दरम्यान, मुग्धा ऑगस्ट महिन्याच्या अखेरीसच ब्रिटनमधून भारतात परतल्या होत्या, अशी माहिती समोर आल्याने कुटुंबीयांना त्या लंडनमध्येच असल्याचा झालेला समज आणि प्रत्यक्ष परिस्थिती यातील तफावतीमुळे या प्रकरणाचे गूढ वाढले आहे. मुग्धा यांच्या मृत्यूचे नेमके कारण अद्याप स्पष्ट झाले नसून, पोलिसांच्या तपासातून अधिक माहिती समोर येण्याची अपेक्षा आहे.