दहशत पसरविण्यासाठी पिस्तुल बाळगणारे गुन्हेगार जेरबंद; 2 गा‌वठी पिस्तुल अन् काडतुसे जप्त

गुन्हेगारीतील क्रेझ तसेच परिसरात दहशत पसरविण्यासाठी अवैधरित्या पिस्तूल बाळगणाऱ्या सराईत गुन्हेगार व त्याच्या मित्राला थरारकरित्या सापळा लावून जेरबंद करण्यात आले.

पुणे : गुन्हेगारीतील क्रेझ तसेच परिसरात दहशत पसरविण्यासाठी अवैधरित्या पिस्तूल बाळगणाऱ्या सराईत गुन्हेगार व त्याच्या मित्राला थरारकरित्या सापळा लावून जेरबंद करण्यात आले. काळेपडळ पोलिसांनी ही कारवाई केली असून, त्यांनी हे पिस्तूल कोठून आणले, याबाबत तपास सुरू करण्यात आला आहे. रितेश बाबासाहेब कसबे (वय १८, रा. महंमदवाडी रोड, हडपसर) तसेच राहुल संजय चौधरी (वय २१, रा. हडपसर) अशी अटक केलेल्या दोघांची नावे आहेत. याप्रकरणी काळेपडळ पोलीस ठाण्यात गुन्हा दाखल करण्यात आला आहे. ही कारवाई वरिष्ठ निरीक्षक मानसिंग पाटील यांच्या मार्गदर्शनाखाली सहाय्यक निरीक्षक अमित शेटे, पोलीस अंमलदार दाऊद सय्यद, अतुल पंधरकर व त्यांच्या पथकाने केली आहे.

विधानसभा निवडणूकीच्या पार्श्वभूमीवर कायदा व सुव्यवस्था राखण्यासाठी पेट्रोलिंग तसेच गस्त घातली जात आहे. तर पाहिजे व फरार आरोपी आणि सराईत गुन्हेगारांवर नजर ठेवली जात आहे. दरम्यान, काळेपडळ पोलीस ठाण्यातील तपास पथकाचे प्रमुख सहाय्यक निरीक्षक अमित शेटे व त्यांचे पथक हद्दीत गस्त घालत होते. तेव्हा पथकाला माहिती मिळाली की, एका रुग्णालयाच्या पाठिमागील बाजूस सराईत गुन्हेगार रितेश व त्याचा मित्र राहुल चौधरी हे दोघे काही तरी गंभीर गुन्हा करण्याच्या तयारीत असून, त्यांच्याजवळ घातक शस्त्र आहेत. त्यानूसार, पथकाने या परिसरात सापळा लावला. मात्र, चाहूल लागताच दोघेही घाबरले.

हे सुद्धा वाचा : मतदानाच्या दिवशी पुणे शहरात पोलिसांचा तगडा बंदोबस्त; तब्बल ‘इतके’ कर्मचारी असणार तैनात

पथकाने त्यांना पकडले आणि त्यांची झडती घेतली. तेव्हा रितेश आणि राहुल याच्या झडतीत एक-एक गावठी पिस्तुल मिळाले. तसेच, ४ काडतुसे मिळाली. त्यांच्याकडे चौकशी केली असता दोघेही पिस्तुल हे दहशत बसविण्यासाठी वापरत असल्याचे समोर आले आहे. दरम्यान, रितेश कसबे हा पोलिसांच्या रेकॉर्डवरील गुन्हेगार आहे. त्याच्यावर वेगवेगळे गुन्हे दाखल आहेत, अशी माहिती काळेपडळ पोलिसांनी दिली.

४० तडीपार गुंडांना पोलिसांनी पकडले

निवडणुकीच्या काळात राजकीय पक्ष तसेच उमेदवारांकडून गुंडाचा वापर केला जात असल्याचा आरोप होत असतानाच पुण्यात आचारसंहिता लागू झाल्यापासून जवळपास ४० तडीपार गुंडांना पुणे पोलिसांनी पकडले आहे. त्यात पुण्यात ऐन निवडणुकीच्या काळात अन् प्रचाराच्या धामधुमीत हे तडीपार गुंड शहरात हजेरी लावत असल्याचे चित्र आहे. त्यामुळे या आरोपींमध्ये तथ्य असल्याचे दिसते. राज्यभरात विधानसभा निवडणुकीची धामधूम सुरू आहे. हे सुरू असतानाच राजकीय पक्ष तसेच उमेदवार गुंडांचा वापर करत असल्याचाही आरोप होत आहे. दरम्यान निवडणूकीत शहरात कायदा सुव्यवस्था राखण्यासाठी पुणे पोलिसांकडून सतर्कता बाळगत काम केले जात आहे. त्यामध्ये बेकायदा हत्यारे बाळगणाऱ्या गुंडांसह तडीपार गुंडावर नजर ठेवली जात असून, त्यांना चाप लावण्यात येत आहे.