सफवान खान टोळीची गुंडगिरी संपणार! मोक्का लागला; विशेष पोलिस महानिरीक्षक यांची मंजुरी

बीड शहरातील पेठ बीड परिसरातील सराईत गुन्हेगार सफवान खान मेहबूब खान आणि त्याच्या टोळीविरुद्ध महाराष्ट्र संघटित गुन्हेगारी नियंत्रण अधिनियम (मोक्का) अंतर्गत कारवाई करण्यात आली आहे.

• सफवान खान टोळीची गुंडगिरी संपणार!
• मोक्का कारवाईसाठी विशेष पोलिस महानिरीक्षक यांची मंजुरी
• टोळीवर अनेक गंभीर गुन्ह्यांची नोंद 

बीड : राज्यासह देशभरात गुन्हेगारी वाढली असून, वाढत्या गुन्हेगारीमुळे नागरिकांमध्ये दहशत निर्माण होत आहे. गुन्हेगारी रोखण्यासाठी पोलिसांकडूनही प्रयत्न सुरु आहेत. अशातच आता बीड शहरातील पेठ बीड परिसरातील सराईत गुन्हेगार सफवान खान मेहबूब खान आणि त्याच्या टोळीविरुद्ध महाराष्ट्र संघटित गुन्हेगारी नियंत्रण अधिनियम (मोक्का) अंतर्गत कारवाई करण्यात आली आहे. बीड ग्रामीण पोलिसांनी सादर केलेल्या प्रस्तावाला छत्रपती संभाजीनगर परिक्षेत्राचे विशेष पोलीस महानिरीक्षक यांनी मंजुरी दिली आहे.

 

११ ऑगस्ट २०२६ रोजी सायंकाळी सातच्या सुमारास शेख मोहम्मद साद शेख हारूण हे मित्रासह सलीम पेट्रोल पंप, इमामपूर रोड येथून परतत होते. त्यावेळी सय्यद साद आझम याने रागाने पाहिल्याच्या कारणावरून त्यांच्याशी वाद घातला. त्यानंतर मारहाण करून त्याने मामा सफवान खान याला फोन करून बोलावून घेतले. सफवान खान याने जवळील पिस्तूलातून फिर्यादी आणि साक्षीदारांच्या दिशेने जीवे मारण्याच्या उद्देशाने गोळीबार केल्याचे पोलिसांच्या तपासात निष्पन्न झाले आहे. या प्रकरणी बीड ग्रामीण पोलीस ठाण्यात गुन्हा क्रमांक ३००/२०२६ दाखल करण्यात आला. पोलीस निरीक्षक सोमनाथ जाधव यांनी तपास केला. तपासात पठाण फरदिन पठाण फेरोज, शिकलकर अरबाज अब्दुल नवाब, सय्यद साद आझम आणि अमान खान नासेर खान पठाण यांच्यासह इतर सहा जणांचा सहभाग निष्पन्न झाला.

गंभीर गुन्ह्यांची नोंद 

टोळीतील आरोपींवर पेठ बीड, बीड ग्रामीण आणि बीड शहर पोलीस ठाण्यांच्या हद्दीत खुनाचा प्रयत्न, अवैध अग्नीशस्त्रे बाळगणे, दंगा, अपहरण, घरात घुसून मारहाण आणि जबरी वसुलीचे गुन्हे नोंद असल्याचे पोलिसांनी सांगितले.

हे सुद्धा वाचा : सातारा रस्त्यावरील दुग्गड चौकातील खड्ड्यांवरून मनसे आक्रमक; प्रशासनाला दिला गंभीर इशारा

वरिष्ठ अधिकाऱ्यांमार्फत प्रस्ताव केला सादर 

बीड ग्रामीण पोलिसांनी मोक्का कारवाईचा प्रस्ताव उपविभागीय पोलिस अधिकारी, अपर पोलीस अधीक्षक आणि पोलीस अधीक्षक यांच्या माध्यमातून विशेष पोलीस महानिरीक्षकांकडे पाठविला होता. त्यास मंजुरी मिळाली आहे.