Latur Crime: लातूरमध्ये शिक्षणसंस्थाचालकाचा मृत्यू; कुटुंब विदेशात, एकटेपणा, आजारपण की घातपात? चिठ्ठीने गूढ वाढले

लातूरच्या शैक्षणिक वर्तुळात ओळख असलेल्या शिक्षण संस्थाचालकाच्या मृत्यूने शहरात खळबळ उडाली आहे. मृत्यूपूर्वी लिहिलेल्या चिठ्ठीमुळे या घटनेचे गूढ अधिकच वाढले असून, पोलिसांसमोर अनेक प्रश्न उभे राहिले आहेत.

• लातूरमधील शिक्षण संस्थाचालक यांचा राहत्या घरी मृत्यू
• मृत्यूपूर्वी चिठ्ठी मध्ये कोणालाही जबाबदार धरू नये असे लिहिल्याची माहिती
• आजारपण आणि एकटेपणातून ही घटना घडल्याचा संशय

लातूर: शैक्षणिक क्षेत्रात ‘लातूर पॅटर्न’ची नेहमीच चर्चा होत असते. विविध शिक्षण संस्था आणि शैक्षणिक उपक्रमांमुळे लातूरची राज्यभरात स्वतंत्र ओळख निर्माण झाली आहे. गेल्या काही दिवसांपासून पेपरफुटीच्या घटनांमुळे लातूर चर्चेत असतानाच आता शहरातून शिक्षण संस्थाचालकाच्या मृत्यूची धक्कादायक घटना समोर आली आहे. संजीव चंद्रभानू सोनवणे (६२) यांचा पद्मानगर परिसरातील त्यांच्या राहत्या घरी मृत्यू झाला. या घटनेमुळे परिसरात खळबळ उडाली आहे. संजीव सोनवणे हे लातूरमधील शिक्षण क्षेत्राशी संबंधित होते. पद्मानगर भागातील त्यांच्या राहत्या घरी ते एकटेच राहत असल्याची प्राथमिक माहिती आहे. त्यांचे कुटुंबीय विदेशात राहत असल्याचे सांगण्यात येत आहे. सोनवणे यांचा मृत्यू नेमका कोणत्या परिस्थितीत झाला, याबाबत पोलिसांकडून तपास सुरू आहे.

हेही वाचा:Nashik Crime: गणरायाच्या स्थापनेसाठी कंपनीत गेले; अन् पुन्हा कधीच परतले नाही!, ३३ वर्षीय इंजिनिअर…

मृत्यूपूर्वी चिठ्ठी लिहिल्याची माहिती

सोनवणे यांच्या मृत्यूपूर्वी लिहिलेली एक चिठ्ठी पोलिसांच्या हाती लागल्याची माहिती समोर आली आहे. या चिठ्ठीत आपल्या मृत्यूसाठी कोणालाही जबाबदार धरू नये, असे त्यांनी नमूद केल्याचे सांगण्यात येत आहे. तसेच आपल्या मृत्यूच्या घटनेचा तपास करू नये, असे आवाहनही चिठ्ठीत केल्याची प्राथमिक माहिती आहे. मात्र, एखाद्या चिठ्ठीत अशी नोंद असल्याने प्रकरणाचा तपास थांबवता येत नाही. मृत्यूची नेमकी कारणे आणि त्यामागील परिस्थिती स्पष्ट करण्यासाठी पोलिसांकडून विविध शक्यता तपासल्या जात आहेत.

आजारपण आणि एकटेपणाची शक्यता

संजीव सोनवणे हे एकटे राहत होते. तसेच त्यांना विविध आजार असल्याची माहिती पोलिसांना मिळाली आहे. कुटुंबीय विदेशात राहत असल्याने एकटेपणामुळे त्यांनी टोकाचे पाऊल उचलले असावे, असा प्राथमिक संशय पोलिसांकडून व्यक्त केला जात आहे. हा केवळ प्राथमिक अंदाज असून, मृत्यूमागे अन्य कोणते कारण आहे का, याचीही चौकशी केली जात आहे. त्यामुळे या प्रकरणात घातपाताची शक्यता आहे का, मृत्यूच्या आधी नेमक्या कोणत्या घटना घडल्या, तसेच चिठ्ठीतील मजकुरामागील पार्श्वभूमी काय आहे, याचा तपास महत्त्वाचा ठरणार आहे.

हेही वाचा:Nashik Cyber Crime: थायलंडच्या नंबरवरून जिल्हाधिकाऱ्यांचा ‘फेक’ अकाउंट; ‘Hello… How are you?’ मेसेज अन्… 

पोलिसांकडून तपास सुरू

घटनेची माहिती मिळाल्यानंतर पोलिसांनी घटनास्थळी जाऊन पाहणी केली. मृतदेहाची वैद्यकीय तपासणी आणि आवश्यक कायदेशीर प्रक्रिया पूर्ण करण्यात आली. घटनास्थळावरील परिस्थिती, उपलब्ध कागदपत्रे तसेच इतर बाबींची पोलिसांकडून पडताळणी केली जात आहे. शिक्षण संस्थाचालक संजीव सोनवणे यांच्या मृत्यूमुळे लातूरच्या शैक्षणिक वर्तुळातही हळहळ व्यक्त होत आहे. त्यांच्या मृत्यूचे नेमके कारण पोलिसांच्या तपासातून स्पष्ट होणार आहे.