Accident News: विरारमध्ये अज्ञात वाहनाची ६५ वर्षीय वृद्धाला जोरदार धडक; मृत्यू, अपघातानंतर चालक वाहनासह पसार
महादेव रत्ना सवर (वय ६५, रा. डोंगरीपाडा, शिरगाव, विरार पूर्व) असे अपघातात मृत्यू झालेल्या वृद्धाचे नाव आहे. याप्रकरणी त्यांचे पुतणे दामोदर हिरा गावीत (वय २४) यांनी विरार पोलीस ठाण्यात फिर्याद दिली आहे. मिळालेल्या माहितीनुसार, दामोदर गावीत हे गुरुवारी कामावर असताना त्यांच्या मित्राचा फोन आला. महादेव सवर यांचा अपघात झाल्याची माहिती मित्राने त्यांना दिली. त्यानंतर दामोदर यांनी घटनास्थळी धाव घेतली. महादेव सवर हे विरार पूर्वेतील चंदनसार परिसरातील गडगापाडा नाक्यापासून सुमारे १०० मीटर अंतरावर असलेल्या ब्रिजवरून जात होते. त्यावेळी एका अज्ञात वाहनाने त्यांना जोरदार धडक दिली. धडकेमुळे सवर गंभीर जखमी झाले.
अपघातानंतर वाहनचालकाने जखमी महादेव सवर यांना वैद्यकीय मदत मिळवून दिली नाही. तसेच पोलिसांना घटनेची माहिती न देता तो वाहनासह घटनास्थळावरून निघून गेल्याचे फिर्यादीत नमूद करण्यात आले आहे. या अपघातात सवर यांचा मृत्यू झाला.
अपघाताची माहिती मिळताच विरार पोलीस ठाण्याचे वरिष्ठ पोलीस निरीक्षक एल. एम. तुरे आणि महिला पोलीस उपनिरीक्षक जाधव यांनी घटनास्थळी भेट देऊन पाहणी केली. पोलिसांनी घटनास्थळाची ‘ई-साक्ष’ नोंद केली आहे. या प्रकरणी विरार पोलिसांनी अज्ञात वाहनचालकाविरोधात भारतीय न्याय संहिता २०२३ मधील कलम १०६ (१), २८१, १२५ (ए), १२५ (बी) तसेच मोटार वाहन कायद्याच्या कलम १८४ आणि १८७ अन्वये गुन्हा दाखल केला आहे. या प्रकरणाची नोंद गुन्हा रजिस्टर क्रमांक ५५६/२०२६ अशी करण्यात आली आहे. अपघातास कारणीभूत ठरलेल्या वाहनाचा आणि चालकाचा शोध घेण्यासाठी पोलिसांकडून तपास सुरू आहे. पुढील तपास पोलीस उपनिरीक्षक गारळे करत आहेत.
.png "Videos"){kind=small}
