रविवार, 9 ऑगस्ट 2026
सौजन्य - नवराष्ट्र टीम
पुणे : वाहनचोरीच्या गुन्ह्यांचा तपास करताना विश्रांतवाडी पोलिसांनी सराईत वाहनचोराला अटक करून त्याच्याकडून तब्बल सहा दुचाकी जप्त केल्या आहेत. जप्त दुचाकींची एकूण किंमत सुमारे ४ लाख ८० हजार रुपये असून, या दुचाकी महागड्या तसेच स्पोर्ट बाईक असल्याचे समोर आले आहे. वाहनचोरीचे आणखी काही गुन्हे उघडकीस येण्याची शक्यता पोलिसांनी व्यक्त केली आहे. ओमकार रामभवन यादव (वय २०, रा. शांतिनगर, येरवडा) असे अटक केलेल्याचे नाव आहे. ही कारवाई वरिष्ठ अधिकाऱ्यांच्या मार्गदर्शनाखाली विश्रांतवाडी पोलिस ठाण्याचे पोलिस निरीक्षक संपत राऊत, सहाय्यक निरीक्षक सुनिल उगले व तपास पथकाने केली आहे.
विश्रांतवाडी पोलिस ठाण्यात दाखल असलेल्या वाहनचोरीच्या गुन्ह्यांचा तपास सुरू असताना पोलिस अंमलदार वामन सावंत आणि संजय बादरे यांना एका खबऱ्यामार्फत संशयित वाहनचोराची माहिती मिळाली. त्यानुसार पोलिसांनी सापळा रचून त्यांना पकडले. त्याच्याकडे सखोल चौकशी केली असता त्याने विविध ठिकाणांहून दुचाकी चोरल्याची माहिती दिल्याचे पोलिसांनी सांगितले. त्याच्या ताब्यातून केटीएम कंपनीची ड्यूक, यामाहा कंपनीची आर-१५, दोन यामाहा आरएक्स-१००, होंडा कंपनीची स्प्लेंडर प्लस आणि पॅशन प्लस अशा एकूण सहा दुचाकी जप्त करण्यात आल्या. वाहनचोरीच्या आणखी घटनांचा तपास सुरू असून, आरोपीकडून मिळालेल्या माहितीच्या आधारे पोलिसांकडून पुढील तपास करण्यात येत आहे.
पुण्यात आणखी चोरीच्या घटना घडल्या आहेत. पुणे शहरातील तीन वेगवेगळ्या चोरीच्या घटनांमध्ये चोरट्यांनी रोकड आणि सोन्याच्या दागिन्यांवर डल्ला मारला असून, कॅम्प भागात हॉटेलच्या किचनची खिडकीतून अडीच लाखांची रोकड चोरीला गेली. तर स्वारगेटहून कात्रजमार्गे लोहगावकडे जाणाऱ्या पीएमपीएमएल बसमध्ये महिलेच्या खिशातून ५० हजार रुपये लंपास केले. तसेच चंदननगर भागात दुचाकीवरून आलेल्या दोघांनी महिलेच्या गळ्यातील २२ ग्रॅम वजनाची सोनसाखळी हिसकावून नेली. तिन्ही घटनांप्रकरणी संबंधित पोलिस ठाण्यांत गुन्हे दाखल करण्यात आले आहेत.
