(फोटो सौजन्य-सोशल मीडिया)
Akshaye Khanna Property: बॉलिवूड अभिनेता अक्षय खन्ना सध्या ‘महाकाली’ चित्रपटातील भूमिकेमुळे चर्चेत आहे. त्यातच आता अभिनेत्याने मुंबईत केलेल्या एका मोठ्या रिअल इस्टेट गुंतवणुकीची चर्चा रंगली आहे. अक्षय खन्नाने मुंबईतील पॉश मलबार हिल परिसरात तब्बल ३३.२६ कोटी रुपयांचं आलिशान अपार्टमेंट खरेदी केलं आहे. प्रॉपर्टी नोंदणी कागदपत्रांचा आढावा घेतल्यानंतर Square Yardsने ही माहिती समोर आणली आहे.
मिळालेल्या माहितीनुसार, अक्षय खन्नाने ३० लिटल गिब्स, मलबार हिल येथील हे आलिशान अपार्टमेंट खरेदी केलं आहे. या घराचं कार्पेट क्षेत्रफळ २,३४१.३९ चौरस फूट असून, त्याला १७५.४५ चौरस फुटांची बाल्कनी आहे. त्यामुळे बाल्कनीसह घराचं एकूण क्षेत्रफळ २,५१६.८४ चौरस फूट होतं. या प्रॉपर्टीसोबत तीन पार्किंग युनिट्सही मिळाले आहेत.
सप्टेंबरमध्ये व्यवहाराची नोंदणी
या आलिशान अपार्टमेंटच्या व्यवहाराची नोंदणी सप्टेंबर २०२६मध्ये करण्यात आली आहे. या व्यवहारासाठी अक्षय खन्नाने १.९९ कोटी रुपयांची स्टॅम्प ड्युटी भरली असून, ३० हजार रुपये रजिस्ट्रेशन चार्ज भरल्याची माहिती समोर आली आहे.
मुंबईतील मलबार हिल हा प्रीमियम निवासी परिसर म्हणून ओळखला जातो. दक्षिण मुंबईतील हा भाग समुद्रकिनाऱ्यालगत असून, आलिशान निवासी प्रॉपर्टी आणि महत्त्वाच्या ठिकाणांच्या जवळीकतेमुळे त्याला मोठी मागणी आहे. हँगिंग गार्डन्स, कमला नेहरू पार्क, बाणगंगा टँक आणि वाळकेश्वर मंदिर यांसारखी ठिकाणे या परिसराच्या आसपास आहेत.
‘धुरंधर’नंतर अक्षय खन्ना पुन्हा चर्चेत
अक्षय खन्नाने आपल्या कारकिर्दीत ‘दिल चाहता है’, ‘हमराज’, ‘हुलचुल’, ‘दृश्यम’ आणि ‘छावा’ यांसारख्या चित्रपटांमध्ये भूमिका साकारल्या आहेत. ‘धुरंधर’मधील रेहमान डकैत या भूमिकेमुळे तो पुन्हा एकदा मोठ्या प्रमाणावर चर्चेत आला. आता त्याच्या नव्या प्रॉपर्टी खरेदीमुळेही त्याचं नाव चर्चेत आलं आहे.
.png "Videos"){kind=small}
