(फोटो सौजन्य- सोशल मीडिया)
Amitabh Bachchan – Saif Ali Khan:‘कौन बनेगा करोडपती १८’च्या आगामी भागात अभिनेता सैफ अली खान आणि अक्षय कुमार त्यांच्या आगामी ‘हैवान’ चित्रपटाच्या प्रमोशनसाठी अमिताभ बच्चन यांच्या शोमध्ये हजेरी लावणार आहेत. या खास एपिसोडमध्ये गप्पा, मजामस्ती आणि चित्रपटाविषयी चर्चा रंगणार आहे. मात्र, यादरम्यान अमिताभ बच्चन यांनी सैफ अली खानसोबत असलेल्या त्यांच्या खास कौटुंबिक नात्याचा खुलासा केला आहे. या नात्याबद्दल फार कमी लोकांना माहिती असल्याचंही बिग बींनी सांगितलं.
‘केबीसी १८’च्या आगामी भागाचा एक प्रोमो सोशल मीडियावर व्हायरल होत आहे. या प्रोमोमध्ये अमिताभ बच्चन सैफ अली खानला म्हणताना दिसतात, “बऱ्याच लोकांना माहित नाही की आपण नातेवाईक आहोत.”
अमिताभ बच्चन यांचं हे बोलणं ऐकून सैफला आश्चर्याचा धक्का बसतो. तो लगेच, “मी?” असं विचारतो. त्यानंतर बिग बी सैफला त्यांच्या कुटुंबांमधील हे कनेक्शन समजावून सांगतात.
अमिताभ बच्चन सांगतात, “राज कपूर यांची मुलगी रितूचा मुलगा निखिल, याचं लग्न माझी मुलगी श्वेता हिच्याशी झालं आहे.”
श्वेता बच्चन यांचा विवाह राज कपूर यांची मुलगी रितू नंदा यांचा मुलगा निखिल नंदा यांच्याशी झाला आहे. त्यामुळे बच्चन आणि कपूर कुटुंबांमध्ये आधीपासूनच जवळचं कौटुंबिक नातं आहे.
राज कपूर हे अभिनेत्री करीना कपूर यांचे आजोबा आहेत. त्यामुळे निखिल नंदा आणि करीना कपूर हे चुलत भावंडे आहेत. दुसरीकडे, करीनाने सैफ अली खानसोबत लग्न केल्यामुळे हे कौटुंबिक कनेक्शन पुढे सैफपर्यंतही पोहोचतं. अशा प्रकारे सैफ आणि बच्चन कुटुंब एकमेकांशी नात्याने जोडले गेले आहेत.
हा खुलासा झाल्यानंतर अमिताभ बच्चन स्वतःच या मोठ्या कौटुंबिक नात्याच्या गुंतागुंतीवर मिश्कील प्रतिक्रिया देताना दिसतात. ते सैफला विचारतात, “तर आता मला जाणून घ्यायचं आहे की मी करीनाला काय म्हणून हाक मारावी? आणि करीना मला काय म्हणून हाक मारेल?”
बिग बींच्या या प्रश्नावर सेटवर हास्याचं वातावरण निर्माण होतं. अमिताभ बच्चन, सैफ अली खान आणि अक्षय कुमार यांच्यातील हा हलकाफुलका संवाद प्रेक्षकांचं लक्ष वेधून घेत आहे.
दरम्यान, सैफ अली खान आणि अक्षय कुमार लवकरच दिग्दर्शक प्रियदर्शन यांच्या ‘हैवान’ या सायकोलॉजिकल थ्रिलर चित्रपटात एकत्र दिसणार आहेत. या चित्रपटात सैयामी खेर, श्रिया पिळगावकर, बोमन इराणी, शारीब हाश्मी, जिशु सेनगुप्ता आणि राजपाल यादव यांच्याही महत्त्वाच्या भूमिका आहेत.
‘हैवान’ हा चित्रपट ११ सप्टेंबर २०२६ रोजी चित्रपटगृहात प्रदर्शित होणार आहे. त्यामुळे चित्रपटाच्या प्रमोशनसाठी सैफ आणि अक्षय ‘कौन बनेगा करोडपती १८’मध्ये पोहोचले असून, याच एपिसोडमध्ये अमिताभ बच्चन यांनी सैफसोबतच्या त्यांच्या कौटुंबिक नात्याचा केलेला खुलासा सध्या चर्चेचा विषय ठरला आहे.
.png "Videos"){kind=small}
