बुधवार, 11 नोव्हेंबर 2026
(फोटो सौजन्य- सोशल मीडिया)
Bigg Boss 20: सलमान खानचा लोकप्रिय रिअॅलिटी शो ‘बिग बॉस २०‘ सध्या घरातील वादांमुळे चर्चेत आहे. शोमध्ये रोज नवनवीन कारणांवरून स्पर्धकांमध्ये खटके उडताना दिसत आहेत. नुकतंच अरिशफा खान आणि लव गिल यांच्यात जोरदार भांडण झालं होतं. आता या घरात आणखी एका वादाची ठिणगी पडली आहे. अभिनेत्री माही विज आणि लव गिल यांच्यात जोरदार शाब्दिक चकमक झाल्याचा प्रोमो समोर आला आहे. विशेष म्हणजे, माही आणि अभिनेता जय भानुशाली यांच्या घटस्फोटाच्या चर्चेवरून हा वाद झाल्याचं पाहायला मिळत आहे.
‘बिग बॉस २०’च्या आगामी एपिसोडमध्ये नॉमिनेशनदरम्यान माही विजचं एक जुनं विधान चर्चेत आलं. यापूर्वी माहीने लव गिलला ‘घर तोडणारा’ म्हटलं होतं. हे ऐकल्यानंतर लव संतापला आणि त्याने माहीला सुनावलं. याचदरम्यान माही विज आणि जय भानुशाली यांच्या घटस्फोटाच्या अफवांचाही विषय निघाला. त्यामुळे माहीचा राग अनावर झाल्याचं प्रोमोमध्ये दिसत आहे.
घटस्फोटाच्या चर्चेवर माही विजचा संताप
व्हायरल प्रोमोमध्ये माही विज लव गिलवर ओरडताना दिसत आहे. आपल्या वैयक्तिक आयुष्याबद्दल घरात चर्चा का केली जात आहे, असा सवाल तिने केला. यावेळी ती भावुक झाली आणि आपल्या घटस्फोटाबद्दल कोणीही चर्चा करू नये, असा इशाराही तिने दिला.
माहीने संतापाच्या भरात, “जो कोणी माझ्या नवऱ्याला या प्रकरणात ओढेल, त्याला मी ठार मारेन,” असं वक्तव्य केलं. हे बोलल्यानंतर ती रागाने गार्डन एरियामध्ये निघून गेली. तिचा हा संताप पाहून घरातील इतर स्पर्धकही काही क्षण शांत झाल्याचं प्रोमोमध्ये दिसत आहे.
Tomorrow Episode Promo: Love, Amrapali & Yung clash with Mahhi over the “Homebreaker” remark, while Love brings up Mahi divorce topic. @HotstarReality https://t.co/XQuezcm6QJ — BBTak (@BiggBoss_Tak) November 10, 2026
या वादात अभिनेत्री आम्रपाली दुबेनेही प्रतिक्रिया दिली. तिने माहीला तिच्या जुन्या विधानाची आठवण करून दिली. “तू सुद्धा लवला ‘घर तोडणारा’ म्हटलं आहेस, जे पूर्णपणे चुकीचं आहे,” असं आम्रपाली म्हणताना दिसते. यावरून माही आणि आम्रपाली यांच्यातही शाब्दिक चकमक झाल्याचं प्रोमोमध्ये पाहायला मिळत आहे.
आता या वादावर आगामी एपिसोडमध्ये काय घडणार, माही आणि लव यांच्यातील वाद आणखी वाढणार का, याकडे प्रेक्षकांचं लक्ष लागलं आहे.
