बुधवार, 11 नोव्हेंबर 2026
(फोटो सौजन्य- सोशल मीडिया)
Sonia Gandhi:बॉलिवूडचे महानायक अमिताभ बच्चन आणि माजी पंतप्रधान राजीव गांधी यांच्यातील मैत्रीचे अनेक किस्से आजही चर्चेत असतात. आता सोनिया गांधी यांच्या नव्या ‘Belonging: A Journey of Love’ या पुस्तकातून त्यांच्या मैत्रीशी संबंधित काही खास आठवणी समोर आल्या आहेत. या पुस्तकात सोनिया गांधी यांनी राजीव गांधी आणि अमिताभ बच्चन यांच्या जुन्या मैत्रीबद्दल अनेक रंजक किस्से सांगितले आहेत. विशेष म्हणजे, सोनिया गांधी पहिल्यांदा इटलीहून भारतात आल्या, तेव्हा त्यांच्या स्वागतासाठी राजीव गांधी, संजय गांधी यांच्यासोबत अमिताभ बच्चनही उपस्थित होते.
सोनिया गांधी यांनी आपल्या प्रेमावर विश्वास ठेवून इटली सोडून भारतात येण्याचा निर्णय घेतला होता. १३ जानेवारी १९६८ रोजी त्या पहिल्यांदा भारतात आल्या. त्यावेळी राजीव गांधी, संजय गांधी आणि अमिताभ बच्चन विमानतळावर त्यांच्या स्वागतासाठी पोहोचले होते. भारतातील पहिल्या भेटीदरम्यान सोनिया गांधी अमिताभ बच्चन यांचे आई-वडील तेजी बच्चन आणि हरिवंश राय बच्चन यांच्यासोबत राहिल्या होत्या.
सोनिया गांधी यांनी पुस्तकात तेजी बच्चन यांच्याबद्दलही विशेष आठवणी सांगितल्या आहेत. तेजी बच्चन यांनी त्यांना भारतीय संस्कृती आणि चालीरीती समजून घेण्यासाठी मदत केली. त्या नेहमीच सोनिया गांधी यांच्या मदतीसाठी तत्पर असायच्या. हरिवंश राय बच्चन यांनीही त्यांना वेळोवेळी मार्गदर्शन केलं. त्यामुळे बच्चन कुटुंबाशी सोनिया गांधी यांचं जवळचं नातं निर्माण झालं होतं.
सोनिया गांधी यांनी पुस्तकात राजीव गांधी आणि अमिताभ बच्चन यांच्या मैत्रीचा आणखी एक मजेशीर किस्सा सांगितला आहे. अमिताभ बच्चन चित्रपटसृष्टीत आपली ओळख निर्माण करण्यासाठी संघर्ष करत होते, त्या काळापासूनच त्यांची आणि राजीव गांधी यांची मैत्री होती. दोघांची कुटुंबंही एकमेकांच्या जवळची होती.
एकदा अमिताभ बच्चन चित्रपटसृष्टीत संघर्ष करत असताना दिल्लीला परतत होते. त्यावेळी राजीव गांधी त्यांना घेण्यासाठी पोहोचले. मात्र, त्यांनी अमिताभ बच्चन यांची गंमत करण्याचं ठरवलं होतं. राजीव गांधी पूर्ण बँडसह त्यांच्या स्वागतासाठी आले होते. त्यांनी फुलांचे असंख्य हारही आणले होते. पण या स्वागतामधील सर्वात मजेशीर गोष्ट म्हणजे त्यांनी आणलेला बँड मुद्दाम बेसूर वाजत होता. अमिताभ बच्चन यांना चिडवण्यासाठी राजीव गांधी यांनी ही खास मस्करी केली होती.
सोनिया गांधी यांनी सांगितलेले हे किस्से राजीव गांधी आणि अमिताभ बच्चन यांच्यातील जिव्हाळ्याच्या मैत्रीची झलक दाखवतात. राजकारण आणि चित्रपटसृष्टीत मोठं नाव कमावण्यापूर्वीपासून सुरू झालेलं त्यांचं मैत्रीचं नातं किती खास होतं, हे या आठवणींमधून पुन्हा एकदा समोर आलं आहे.
