
(फोटो सौजन्य-सोशल मीडिया)
Bigg Boss 20: ‘बिग बॉस २०’ हा रिअॅलिटी शो सध्या चांगलाच चर्चेत आहे. या शोमधील स्पर्धकांची लोकप्रियता दिवसेंदिवस वाढताना दिसत आहे. त्यातच स्पर्धक काझी तौकीर याचीही जोरदार चर्चा सुरू आहे. शोमध्ये त्याच्या खेळाला प्रेक्षकांकडून पसंती मिळत असून चाहते त्याला बाहेरूनही मोठा पाठिंबा देत आहेत. आता काझीच्या चाहत्यांसाठी एक खास बातमी समोर आली आहे. काश्मीरमधील एका कॅफेने त्याच्या नावाने खास फूड प्लॅटर सादर केले आहे.
काश्मीरमधील ‘मैदानी कॅफे’ने ‘काझी प्लेट’ नावाची विशेष थाळी आपल्या मेन्यूमध्ये आणली आहे. विशेष म्हणजे, ही थाळी केवळ मेन्यूमध्ये आणखी एक पदार्थ जोडण्यासाठी तयार करण्यात आलेली नाही, तर काझीच्या चाहत्यांना एकत्र आणण्याचा हा प्रयत्न असल्याचे कॅफेकडून सांगण्यात आले आहे.
कॅफेने सोशल मीडियावर या खास थाळीचे पोस्टर शेअर केले आहे. त्यासोबतच्या इन्स्टाग्राम कॅप्शनमध्ये लिहिले आहे, “काझीच्या चाहत्यांसाठी आणि त्यांच्या आवडत्या व्यक्तीसाठी एक खास मेजवानी. एक प्लेट, तीन लोक आणि काझीवर भरपूर प्रेम.” या पोस्टमुळे काझीच्या चाहत्यांमध्ये उत्सुकता निर्माण झाली आहे.
तसेच, कॅफेने शेअर केलेल्या आणखी एका पोस्टरवरही खास संदेश लिहिण्यात आला आहे. काझीवर प्रेम करणाऱ्या आणि त्याला पाठिंबा देणाऱ्या चाहत्यांसाठी ही थाळी तयार करण्यात आल्याचे त्यातून स्पष्ट होते. त्यामुळे काझीच्या लोकप्रियतेची चर्चा आता केवळ बिग बॉसच्या घरापुरती मर्यादित राहिलेली नाही, तर ती कॅफेच्या मेन्यूपर्यंतही पोहोचली आहे.
दरम्यान, ‘बिग बॉस २०’मध्ये सुरुवातीपासूनच काझी तौकीर चर्चेत आहे. त्याच्या खेळाचे प्रेक्षकांकडून कौतुक केले जात असून अनेक चाहते त्याला उघडपणे पाठिंबा देत आहेत. आता काश्मीरमधील कॅफेने त्याच्या नावाने खास थाळी सादर केल्याने त्याच्या लोकप्रियतेची पुन्हा एकदा चर्चा रंगली आहे.