मंगळवार, 25 ऑगस्ट 2026
( फोटो सौजन्य- सोशल मीडिया)
Haiwaan Trailer Release: अक्षय कुमार आणि सैफ अली खान तब्बल १८ वर्षांनंतर पुन्हा एकदा मोठ्या पडद्यावर एकत्र दिसणार आहेत. दोघांना ‘टशन’नंतर पुन्हा एकत्र पाहण्यासाठी चाहते उत्सुक आहेत. त्यांच्या आगामी ‘हैवान’ चित्रपटाचा बहुप्रतीक्षित ट्रेलर नुकताच प्रदर्शित झाला असून, ट्रेलरमधील अक्षय कुमारचा खतरनाक अवतार पाहून प्रेक्षकांची उत्सुकता आणखी वाढली आहे.
दोन मिनिटे ३४ सेकंदांच्या या ट्रेलरची सुरुवात एका रहस्यमय भीतीने होते. शहरात एकामागून एक हत्या होत असल्याचं दिसतं. या घटनांमुळे सर्वत्र दहशतीचं वातावरण निर्माण झालं आहे.
दरम्यान, सैफ अली खान आपल्या भूमिकेत व्यथित आणि हताश दिसतो. त्यानंतर पोलिसांकडून त्याला अटक केली जाते. विशेष म्हणजे, सैफ एका दिव्यांग व्यक्तीचं सोंग घेत असल्याचं ट्रेलरमध्ये पाहायला मिळतं.
ट्रेलरच्या पुढील भागात अक्षय कुमारची दमदार एन्ट्री होते. अॅक्शनने भरलेल्या या अवतारात अक्षय खलनायकाच्या भूमिकेत दिसत आहे. त्याचा लूक, देहबोली आणि हिंसक अंदाज लक्ष वेधून घेतो.
ट्रेलरवरून अक्षय आणि सैफच्या व्यक्तिरेखांमध्ये संघर्ष होणार असल्याचे संकेत मिळतात. मात्र, हा संघर्ष नेमका कशासाठी आहे, याचा खुलासा निर्मात्यांनी केलेला नाही.
‘हैवान’चा ट्रेलर पाहिल्यानंतर चित्रपटाची कथा सूडाभोवती फिरत असल्याचे संकेत मिळतात. अक्षय कुमार निष्पाप लोकांना का मारत आहे? त्याच्या या कृत्यामागे नेमकं कारण काय? आणि सैफ अली खान त्याला कसा सामोरा जाणार? असे अनेक प्रश्न ट्रेलरमुळे निर्माण झाले आहेत.
निर्मात्यांनी कथानकाचा फारसा खुलासा न करता सस्पेन्स कायम ठेवला आहे. त्यामुळे चित्रपटात नेमकं काय घडणार, याची उत्सुकता प्रेक्षकांमध्ये निर्माण झाली आहे.
View this post on Instagram
ट्रेलरमध्ये अक्षय आणि सैफसोबत सैयामी खेर आणि बोमन इराणी यांचीही झलक पाहायला मिळते. याशिवाय दयानंद शेट्टी आणि श्रिया पिळगावकर यांच्याही भूमिका चित्रपटात आहेत.
‘हैवान’च्या निमित्ताने अक्षय कुमार आणि सैफ अली खान तब्बल १८ वर्षांनंतर पुन्हा एकत्र काम करत आहेत. यापूर्वी दोघे ‘टशन’ या चित्रपटात एकत्र दिसले होते. त्यामुळे या जोडीला पुन्हा मोठ्या पडद्यावर पाहण्यासाठी चाहत्यांमध्ये विशेष उत्सुकता आहे.
ट्रेलरमधील अॅक्शन, रहस्य आणि अक्षय कुमारचा खलनायकी अवतार पाहता ‘हैवान’ हा चित्रपट प्रेक्षकांसाठी थरारक अनुभव ठरण्याची शक्यता आहे.
