मंगळवार, 25 ऑगस्ट 2026
( फोटो सौजन्य- सोशल मीडिया)
Kangana Ranaut Abhijeet English: अभिनेत्री आणि भाजप खासदार कंगना रणौत पुन्हा एकदा आपल्या स्पष्टवक्तेपणामुळे चर्चेत आली आहे. कंगनाने ‘कॉकरोच जनता पार्टी’चे (CJP) संस्थापक अभिजीत दीपके यांच्या इंग्रजी बोलण्याच्या क्षमतेवर भाष्य करत दोघांची तुलना करणारी सोशल मीडिया पोस्ट शेअर केली आहे.
कंगनाने आपल्या इन्स्टाग्राम स्टोरीवर एक रील शेअर केली आहे. या रीलमध्ये सुरुवातीला अभिजीत दीपके इंग्रजीमध्ये सार्वजनिक विधान करताना दिसतात. त्यानंतर कंगना रणौत इंग्रजीमध्ये बोलत असल्याची क्लिप दाखवण्यात आली आहे.
ही रील शेअर करत कंगनाने लिहिलं, “बारावी पास कंगना रणौत विरुद्ध बॉस्टन युनिव्हर्सिटीच्या CJP दीपकची इंग्रजीची पातळी. एक जबरदस्त आहे, तर दुसऱ्याला रिबूटची गरज आहे.”
या पोस्टमधून कंगनाने अप्रत्यक्षपणे दीपके यांच्या इंग्रजीवर निशाणा साधला आहे.
( फोटो सौजन्य- सोशल मीडिया)
कंगना रणौतने यापूर्वी तिच्या अभिनय कारकिर्दीच्या सुरुवातीच्या काळात इंग्रजी भाषेमुळे आलेल्या अडचणींबद्दल भाष्य केलं आहे. ‘कॉफी विथ करण’ या कार्यक्रमातील एका प्रसंगाचा उल्लेख करत तिने सांगितलं होतं की, तिच्या इंग्रजीवरून तिची खिल्ली उडवण्यात आली होती.
या अनुभवाबद्दल बोलताना कंगनाने म्हटलं होतं की, इंग्रजी बोलता येत नाही म्हणून कोणत्याही बाहेरच्या व्यक्तीची खिल्ली उडवली जाऊ नये, हा धडा तिने या अनुभवातून घेतला.
कंगनाने पुढे तिच्या वयाच्या २४व्या वर्षी सार्वजनिकरित्या झालेल्या टीका आणि अपमानाचा उल्लेख करत, त्या परिस्थितीतही तिने शालीनता, समजूतदारपणा, विनोदबुद्धी आणि विनयशीलता कायम ठेवली असल्याचं म्हटलं होतं.
दरम्यान, अभिजीत दीपके यांनी रविवारी आपल्या इन्स्टाग्राम स्टोरीजच्या माध्यमातून इंग्रजी बोलण्याबाबत त्यांना विचारण्यात आलेल्या प्रश्नांना उत्तरं दिली.
एका चाहत्याने “इंग्रजी बोलताना तुम्ही का संकोच करता?” असा प्रश्न विचारला होता. त्यावर दीपके यांनी कॅमेऱ्यासमोर बोलताना आपल्याला काहीसं अस्वस्थ वाटत असल्याचं स्पष्ट केलं.
दरम्यान, कंगनाने शेअर केलेल्या या पोस्टमुळे सोशल मीडियावर दोघांच्या इंग्रजी बोलण्याच्या शैलीची चर्चा रंगली आहे.
