( फोटो सौजन्य- सोशल मिडिया)
Jasmin Bhasin:‘खतरों के खिलाडी १५’च्या सेटवर अभिनेत्री जस्मिन भसीनसोबत एक धक्कादायक घटना घडली आहे. एका धोकादायक स्टंटनंतर जस्मिनला काही काळासाठी स्मरणशक्तीचा त्रास झाला. स्टंटनंतर नेमकं काय घडलं, याची कोणतीही आठवण तिला राहिली नसल्याचं तिने स्वतः सांगितलं आहे. तिच्या या खुलाशामुळे शोचा होस्ट रोहित शेट्टीदेखील काही काळ चिंतेत पडला होता.
‘खतरों के खिलाडी १५’च्या आगामी एपिसोडचा प्रोमो सध्या चर्चेत आहे. या प्रोमोमध्ये जस्मिन भसीन तिच्यासोबत घडलेल्या धक्कादायक अनुभवाबद्दल सांगताना दिसत आहे. पाणी आणि हवेशी संबंधित स्टंट केल्यानंतर लगेचच तिच्या स्मरणशक्तीवर परिणाम झाल्याचं तिने सांगितलं.
जस्मिन म्हणाली, “माझ्यासाठी हा एक खूप धक्कादायक अनुभव होता. स्टंटनंतर लगेच काय घडलं ते मला आठवत नाही आणि आजही मला त्यातला एकही भाग आठवत नाही. मला काहीच आठवत नाही.”
यानंतर डॉक्टरांनी तपासणी केल्यानंतर तिच्या डोक्याला दुखापत झाल्याचं समोर आलं. डॉक्टरांनी तिला सौम्य दुखापत झाल्याचं सांगत ७२ तास पूर्ण विश्रांती घेण्याचा सल्ला दिला.
स्टंटनंतर जस्मिनने रोहित शेट्टीला स्टंट नेमका काय होता, असं विचारलं. “मला काही आठवत नाही,” असं जस्मिन म्हणताच रोहित शेट्टीही आश्चर्यचकित आणि चिंतेत पडला.
रोहितने तिला विचारलं, “तुला स्टंट आठवत नाही का? तू आत्ता काय केलंस, ते माहीत नाही का?” जस्मिनच्या या अवस्थेमुळे सेटवरील वातावरणही गंभीर झाल्याचं प्रोमोमध्ये पाहायला मिळत आहे.
विशेष म्हणजे, या धोकादायक स्टंटदरम्यान जस्मिन जखमी झाली असली तरी तिने आपल्या टीमसाठी जबरदस्त कामगिरी केली. दुखापतीनंतरही तिने आपल्या संघाला विजय मिळवून दिला.
या कठीण प्रसंगात साथ दिल्याबद्दल जस्मिनने रोहित शेट्टी, चॅनल, प्रोडक्शन टीम आणि वैद्यकीय कर्मचाऱ्यांचे आभार मानले आहेत. या घटनेनंतर तिला रुग्णालयातही दाखल करण्यात आलं होतं. यापूर्वी रुबिना दिलैकलाही शोदरम्यान रुग्णालयात नेण्यात आलं होतं.
जस्मिन भसीन यापूर्वीही ‘खतरों के खिलाडी’मध्ये सहभागी झाली आहे. हा शोमधील तिचा तिसरा सहभाग आहे. अभिनेत्रीने यापूर्वी ‘खतरों के खिलाडी ९’मध्ये सहभाग घेतला होता. त्यानंतर ती ‘खतरों के खिलाडी: मेड इन इंडिया’ या विशेष पर्वाचाही भाग बनली होती. आता ‘खतरों के खिलाडी १५’मध्ये पुन्हा एकदा ती धोकादायक स्टंट्सचा सामना करताना दिसत आहे.
.png "Videos"){kind=small}
